აშშ-ის წარმომადგენლობითმა პალატამ სომეხთა გენოციდი აღიარა

აღნიშნულ ინფორმაციას “როიტერსი“ ავრცელებს.

რეზოლუციას, რომელიც 1,5 მილიონი სომეხის მკვლელობას გენოციდად აღიარებს, მხარი 405 კანონმდებელმა დაუჭირა, წინააღმდეგი კი - 11 იყო.

თურქეთის საგარეო საქმეთა სამინისტრომ რეზოლუცია დაგმო და განცხადება გაავრცელა, სადაც აღნიშნულია რომ გენოციდის შესახებ რეზოლუცია „უაზრო პოლიტიკური ნაბიჯია და მისი ერთადერთი ადრესატი სომხური ლობი და ანტი-თურქული ჯგუფებია“.


„მოვუწოდებთ აშშ-ის კონგრესს, ნუ გამოიყნებენ ორმხრივი ურთიერთობების საკითხებს საშინაო პოლიტიკური მიზნებისთვის,“ - აღნიშნულია თურქეთის საგარეო საქმეთა სამინისტროს განცხადებაში.

უწყება დონალდ ტრამპის ადმინისტრაციას მოუწოდებს, ორმხრივი ურთიერთობების კიდევ უფრო გაუარესება აღკვეთოს.

თურქეთი აღიარებს, რომ პირველი მსოფლიო ომის დროს ოსმალეთის იმპერიაში ოსმალურ ძალებთან შეტაკებას უამრავი სომეხი ადამიანის სიცოცხლე შეეწირა, მაგრამ ირწმუნება, რომ ეს გენოციდი არ ყოფილა.

ეთნიკური სომხების მასობრივი დეპორტაციის დაწყების თარიღად 1915 წლის 24 აპრილი ითვლება, როდესაც ხელისუფლებამ 250–მდე სომეხი ეროვნების ინტელექტუალი და თემის ლიდერი ჯერ დააპატიმრა, შემდეგ კი სიკვდილით დასაჯა. სომხები, რომლებიც ოსმალთა იმპერიის არმიაში მსახურობდნენ, განაიარაღეს და მოკლეს, კონფისკაცია გაუკეთეს მათ ქონებასაც. პროცესი 1918 წლის სექტემბრამდე გაგრძელდა. სომხური მხარე ამბობს, რომ სამი წლის განმავლობაში 1,5 მილიონზე მეტი ადამიანი დაიღუპა.

[sknews.ge]