ახალციხის რაიონულმა სასამართლომ სადაო საძოვრების ირგვლივ საქმის განხილვა დღეს, 25 ოქტომბერს დაიწყო.
მოსარჩელე ოჯახებთან და მათ ინტერესების დამცველებთან ერთად, სხდომას მოპასუხე მხარეების წარმომადგენლები ესწრებოდნენ.
დაცვის მხარის მიერ შეტანილი სარჩელის მიხედვით. საქმეში ქონების მართვის სააგენტო, ეკონომიკის სამინისტრო, საჯარო რეესტრი, საქართველოს მთავრობა და საპატრიარქო ჩაერთო, რომელთა იურისტებიც დღეს სხდომას ესწრებოდნენ.
სხდომა მხარეებმა შუამდგომლობებით დაიწყეს, საქმეში არსებული მტკიცებულებები წარადგინეს და შესავალი სიტყვა წაიკითხეს.
პირველი შუამდგომლობა დაცვის მხარემ დააყენა, ადამიანის უფლებების სწავლებისა და მონიტორინგის ცენტრის იურისტმა, მოსამართლე გია ბერაიას აცილების საკითხი დააყენა.
„ბატონო მოსამართლე, რამდენიმე დღის წინ მოხდა ასეთი ფაქტი, რომ ერთ–ერთი მოსარჩელე დავით ბერიძე დაიბარა არქიმანდრიტმა ნიკოლოზ გეწაძემ და უთხრა, თქვენსა და მას შორის შედგა საუბარი, საიდანაც იცოდა რომ მოსარჩელე მხარეს საქმეში საკმარისი მტკიცებულებები არ აქვს და ამიტომ შესაძლებელია საქმე წააგონო, ამის შემდეგ გეწაძემ ნიკოლოზ ბერიძეს ურჩია, რომ სარჩელი უკან გაეტანა“, - განაცხადა ადამიანის უფლებების სწავლებისა და მონიტორინგის ცენტრის იურისტმა.
მოსამართლემ ადვოკატის ნათქვამი კატეგორიულად უარყო და განაცხადა, რომ არქიმანდრიტს არასოდეს დაკავშირებია და მას არ იცნობს.
ბერიძის გადმოცემის მიხედვით, იურისტის ნათქვამი უარყო არქიმანდრიტმა ნიკოლოზ გეწაძემაც, რომელიც სასამართლო სხდომაზე იმყოფებოდა: „მე აქ ვარ და გიპასუხებთ ყველაფერზე, ეს ყველაფერი სიცრუეა, სიმართლეს არ შეესაბამება, ჩემსა და მოსამართლეს შორის არანაირი საუბარი არ მომხდარა“.
საბოლოოდ მოსამართლემ დაცვის მხარის შუამდგომლობა არ დააკმაყოფილა.
„სამხრეთის კარიბჭესთან“ კი საძოვრის ერთ-ერთი მოდავე დავით ბერიძე ირწმუნება, რომ მასსა და არქიმანდრიტს შორის შეხვედრა, მოხეში დედათა მონასტრის ეზოში სექტემბრის ბოლოს ნამდვილად მოხდა.
„ადგილობრივი გამომიგზავნა დამიბარა და მითხრა, ის რაც ჩემმა ადვოკატმა გააჟღერა, ახლა კი ამბობს, რომ თითქოს მე ვცრუობ“,-ამბობს დავით ბერიძე.
დაცვის მხარემ სხდომაზე ექვსი მოწმის დაკითხვის შესახებ შუამდგომლობაც დააყენა, რომლებიც ოთხი სოფლის მკვიდრები არიან, აღნიშნულიც მოსამართლე გია ბერაიამ დააკმაყოფილა.
დღეს, კიდევ ერთი შუამდგომლობა ეკონომიკის სამინისტროს იურისტს ჰქონდა. იმის გამო რომ მოპასუხე მხარის ხუთივე, უწყების ცენტრალური ოფისი თბილისშია, იურისტმა სხდომების განხილვა თბილისის საქალაქო სასამართლოში მოიხოვა, რაზეც მოსამართლისაგან უარი მიიღო.
შემდეგი სასამათლო სხდომა ოთხ ნოემბერს 14:30 საათზე ჩაინიშნა, სადაც საქმეში არსებული მტკიცებულებების გამოკვლება დაიწყება.
ადიგენში,
13 ოჯახის სასარჩელო მოთხოვნა დერცელი-კიკიბოს ტერიტორიაზე იმ შვიდი ჰექტრის საცოვრის რეგისტრაციის გაუქმებაა, რომლის მიხედვითაც ტერიტორია საქართველოს საპატრიარქოს გასული წლის შემოდგომით გადაეცა. ამ ტერიტორიაზე ტაძარიც შენდება, თუმცა ეს ნაწილი სადაო არ არის რადგან ადგილობრივები თანახმა, არიან ერთი ჰექტარი საპატრიარქოს დაუთმოს თავისი მიზენების განსახორციელებლად.
13 ოჯახის უფლებებს სასამართლოშო ადამიანის უფლებების სწავლებისა და მონიტორინგის ცენტრი (EMC) იცავს. ორგანიზაციამ სპეციალური
განცხადებაც გაავრცელა და აღნიშნული ადიგენში მუსლიმი თემის უფლებების იგნორირების პრაქტიკის გაგრძელებად შეაფასა.
[ლუბა გიორგაძე, ადიგენი]