გია მურღულია სკოლების დაფინანსების ცვლილების აუცილებლობაზე საუბრობს

გია მურღულია სკოლის დირექტორების შესარჩევი კონკურსის თემას ფეისბუქის გერდზე ეხმიანება.

მისი განმარტებით, ძალიან მალე სკოლის მოქმედი დირექტორები და ამ პოსტის მაძიებელნი, მთელი საქართველოს მასშტაბით, ჯერ გასაუბრებას გაივლიან, შემდეგ კი, განათლებისა და მეცნიერების სამინისტროს წარდგენით, შეეცდებიან სკოლების სამეურვეო საბჭოებს საკუთარი ხედვისა და კომპეტენციის უპირატესობა დაუსაბუთონ.

მურღულია ამბობს, რომ სოციალურ ქსელში უკვე გამოჩნდა სხვადასხვა კანდიდატის შეხედულება, თუ როგორ ესახება კონკრეტული სკოლის განვითარების სტრატეგიული გეგმის შედგენა და რეალიზება. ეს ფაქტი მას ლოგიკურად მიაჩნია, თუმცა, იმ ხარვეზზე ამახვილებს ყურადღებას, რაც ამ ფაქტს ახლავს.

„საქმე ის არის, რომ ნებისმიერი სტრატეგიული გეგმის განხორცილებას "თავისუფალი ფული" სჭირდება, რაც ჩვენს საჯარო სკოლებს პრაქტიკულად არ გააჩნიათ. ის სისტემა, რითაც წლების განმავლობაში სახელმწიფო მათ აფინანსებთ, უკეთეს შემთხვევაში, მხოლოდ "კვლავწარმოებას" გულისხმობს და განვითარებას კი - არანაირად ანუ, მოკლედ რომ ვთქვათ, თქვენ ყოველ მომდევნო წელს შეგიძლიათ დაგეგმოთ და გააკეთოთ ის, რასაც წელს აკეთებდით (უკეთესად ან უარესად), ინოვაციას კი ახლოსაც ვერ გაეკარებით, რადგან საამისო სახსრები არ გექნებათ (რომ არაფერი ვთქვათ პედაგოგთა ნაწილის არასაკმარის კომპეტენციასა და მასწავლებელთა სრული კორპუსის მოტივაციის ნაკლებობაზე)“, - ამბობს მურღულია.

მისივე თქმით, ამ ყველაფრიდან გამოდის, რომ მომავალი დირექტორის სკოლის განვითარების გეგმის რეალიზებას ვერასოდეს შეძლებს და ფაქობრივად გამოვა, რომ მისეული ხედვის მშობლებისთვის წარდგენისას არარსებულ რეალობაზე ისაუბრებს.

„რომელიმე გონიერი პედაგოგის ან მშობლის ერთი უბრალო კითხვა - "მაინც რა სახსრებით აპირებთ ამ ყველაფრის გაკეთებას?" - თეორიულად თუნდაც ძალიან კარგი გეგმისგან ქვას ქვაზე არ დატოვებს.

როდესაც ამაზე ვფიქრობთ (იმედი მაქვს - ყველანი ერთად), უპრიანი იქნება იმგვარი საზოგადოებრივი აზრის შექმნაზე ვიზრუნოთ, რაც სახელმწიფოს მთავარ მესვეურებს ასეთ მოთხოვნას წაუყენებს: "ბატონებო, გადადგით არასტანდარტული და გაბედული ნაბიჯები განათლების სისტემის დაფინანსების ხარისხობრივად გასაზრდელად. დააფინანსეთ ფიქრი, რომელიც სკოლას უკეთესს გახდის - დააფინანსეთ სკოლის განვითარება! - ამის გარეშე სხვა ყველაფერთან ერთად (მართვის გაუმჯობესება, განათლების ხარისხის ამაღლება, პროფესიული განვითარება...) დირექტორთა კონკურსიც მხოლოდ ფორმალობად იქცევა", - აცხადებს მურღულია.

[sknews.ge]