‘აბასთუმნის ფილტვის ცენტრი’ საქმიანობის დასაწყებად ლიცენზიას ელოდება

ფილტვის ცენტრში სტაციონალური პირობების შესამოწმებლად სპეციალურმა კომისიამ რამდენიმედღიანი მუშაობა დღეს, 24 ოქტომბერს დაასრულა.

ცენტრში ამბობენ, რომ მომავალ კვირაში უკვე სტაციონალური საქმიანობის ლიცენზია ექნებათ და მუშაობის დაწყებას შეძლებენ:„ ჯანმრთელობის დაცვის სამინისტროსა და მთავრობის მიერ განსაზღვრულია პირობები, რასაც ამა თუ იმ პროფილის სტაციონალური დაწესებულება უნდა აკმაყოფილებდეს. სწორედ ამ ჩამონათვალთან შესაბამისობის შემოწმება ხდება. ამაში შედის, როგორც ინფრასტრუქტურა, ისევე ტექნიკური აღჭურვა, სამედიცინო თუ სხვა პერსონალის შესაბამისობა. მრავალპროფილური მიდგომაა და თუ დააკმაყოფილებ პირობებს, ლიცენზია გაიცემა“, - ამბობს „აბასთუმნის ფილტვის ცენტრის“ დირექტორი რევაზ ჟღენტი.

ცენტრს ფუნქციონირებისთვის ორი სახის ლიცენზია სჭირდება, სტაციონალური საქმიანობისთვის, რომელსაც ელოდებიან და რადიოლოგიური კვლევის, რომელიც წინა კვირას მიიღო. ჟღენტი ფიქრობს, რომ მომავალ კვირას უკვე ორივე ლიცენზია ექნებათ და მუშაობას შეუდგებიან. უკვე დაკომპლექტებულია თანამშრომლებიც. ცენტრში 145 შტატიანი თანამშრომელი იქნება, დაცვის სამსახურის ჩათვლით.

„ყველა ძველი თანამშრომელი შენარჩუნებულია და გადმოყვანილი ახალ დაწესებულებაში. ზოგიერთს შეეცვალა ფუნქციური დატვირთვა, ერთი პოზიციიდან მეორეზე გადავიდა. მოხდა ახალი თანამშრომლების დამატებაც, იმიტომ რომ კანონმდებლობაში მოხდა ცვლილებები და შეიქმნა ახალი სამუშაო ადგილებიც“, - ამბობს რევაზ ჟღენტი.

რაც შეეხება პაციენტების მკურნალობას, მას შემდეგ, რაც ფილტვის ცენტრი გაიხსნება, აქ სტაციონალურ (ცენტრში მწოლიარე ავადმყოფის მკურნალობა) მკურნალობა შესაძლებელი იქნება: „პროგრამით განსაზღვრული სარეაბილიტაციო კურსი მოიცავს ოცდღიან მკურნალობას. შემოვლენ და იქნებიან აქ კურსის ბოლომდე, შემდეგ გაეწერებიან და წავლენ სახლში“.

აბასთუმანში, ფილტვით დაავადებულთა ცენტრის მშენებლობა, ფონდ „ქართუს“ დაფინანსებით, ოქტომბერში დაიწყო და 2019 წლის გაზაფხულზე უნდა დასრულებულიყო. შენობა 100 საწოლზე იქნება გათვლილი და აქ ფილტვზე სხვადასხვა დაავადების მქონე პაციენტები იმკურნალებენ.

კურორტიდან მოშორებით ტუბსაავადმყოფოს გადატანა მას შემდეგ გადაწყდა, რაც აქ დასასვენებლად „ქართული ოცნების“ თავმჯდომარე და ბიზნესმენი ბიძინა ივანიშვილი იმყოფებოდა.

უკვე ყოფილი ტუბსაავადმყოფო კი მარტის ბოლოს დაიკეტა. პაციენტების ნაწილი თბილისში, ნაწილი კი ამბულატორიულად გაწერეს.

[თაკო ფეიქრიშვილი, ადიგენი]