მესხური ნობათი სოფელ ნიჯგორიდან [Photo]

პატარა, სახელდახელოდ შეკრულ ხის მაგიდაზე თუთის არაყი, ბაქმაზი, ტყლაპი, მწნილი, გოგრის კურკა, თუთის ხმელი და კონებად შეკრული სატაცური დევს. იქვე, შორიახლოს, თავშალშემოხვეული და მზისგან დამწვარი სახით 50 წლამდე ქალი ზის, ახალმოკრეფილ სატაცურს არჩევს და ყველა მანქანას ინტერესით აკვირდება.

ვარძიისკენ მიმავალ გზაზე, ასპინძიდან 9 კილომეტრში, სოფლის პროდუქტებით დახუნძლული მაგიდები არავის უკვირს. ეს სოფელი ნიჯგორია. ადგილობრივები მთელი წლის მანძილზე მოყვანილ პროდუქტს ყიდიან.



20 წელია, გულო დიასამიძის ყოველი დილა გამთენიას, 6 საათზე იწყება. ცდილობს დროზე მოუაროს საქონელს, ძროხები მოწველოს, ყველი ამოიყვანოს, საოჯახო საქმეებს მორჩეს და ეზოში, პატარა მაგიდაზე, გასაყიდი პროდუქტები დააწყოს.

„თით– ოროლოა კაპიკს ვიღებთ შვილო. უცხოელები უფრო მეტად თუთის არაყს ეტანებიან. პენსია მე არ მაქვს და ხელფასი. ეს არის ჩვენი ერთადერთი შემოსავალი“, – მეუბნება გულო დიასამიძე, მხარზე გადაკიდებულ აპარატს უყურებს და ფოტოს გადასაღებად ემზადება, – “აქ ხშირად ჩერდებიან ტურისტებიც და ჟურნალიტებიც. ვიცი ფოტოს გადაღება გინდათ, ხილს დავიჭერ ხელში, უფრო ლამაზი რომ იყოს“.

ახლა მოთხოვნადი სატაცურია. როგორც ნიჯგორელი ქალები ამბობენ, სატაცური გემრიელთან ერთდ სასარგებლოა: „გულისთვის არის კარგი,ზოგი ხარშავს და მწვანილებით კაზმავს, ზოგი მწინლს ამზადებს. ერთი პატარა პარკი 5 ლარი ღირს. წინა დღეს მოვკრეფთ და მეორე დღეს უკვე აღარ მაქვს ხოლმე“, – ამბობს 63 წლის ზოია ლონდარიძე.



დაახლოებით 6 მეტრში თინა ლონდარიძის მაგიდა დგას. ვარძიის დასათვალიერებლად მიმავალი უცხოელი ტურისტები მისგან თუთის ნაწარმს ყიდულობენ: „ჩვენს სოფელში თუთა ყველას აქვს. ვაკეთებთ არაყს, ტყლაპს, თუთის ხმელს და ბაქმაზს. თუთა ერთგვარად ჩვენი სოფლის სავიზიტო ბარათია“.

ნოჯგორში საკუთარ „ყანაში“ მოყვანილ პორუდუქტებს დაახლოებით 15 ოჯახი ყიდის. აქ წელიწადის ნემისმიერ დროს შეგიძლიათ სოფლის ნატურალური პროდუქტის შეძენა, – ჭრელ თავსაბურავიანი ნიჯგორელი ქალები, ‘ნავაჭრს’ცელოფნის პარკებში ღიმილით ჩაგილაგებენ და გზას დაგილოცავენ.

სოფელი ნიჯგორი ასპინძა–ვარძიის გზაზე, ზღვის დონიდან 1450 მეტრზე მდებარეობს. სოფელი, რომელშიც 2014 წლის აღწერით, 294 ადამიანი ცხოვრობს, დაბა ასპინძიდან 9 კილომეტრში მდებარეობს.



[თინათინ ზაზაძე, ასპინძა]