‘იქ ჩემი კომპანიები არ არის’ - ტენდერების საქმეზე ახალციხის მერი დაიკითხა

სახელმწიფო უსაფრთხოების სამსახურის ანტიკორუფციულმა სააგენტომ, ხალციხის მუნიციპალიტეტის მერთან დაკავშირებული კომპანიების მიერ მოგებულ ტენდერებზე, გამოძიება სამსახურეობრივი უფლებამოსილების ბოროტად გამოყენების მუხლით დაიწყო. მერი ადასტურებს, რომ დაკითხავზე იმყოფებოდა.

საქმე ეხება „საერთაშორისო გამჭვირვალობა–საქართველოს“ მიერ გამოქვეყნებულ კვლევას, რომლის მიხედვითაც, ახალციხის მერთან, ზაზა მელიქიძესთან დაკავშირებული კომპანიები, მისი გამგებლობისა და მერობის შემდეგ, ტენდერებს იგებენ.

„საერთაშორისო გამჭვირვალობის“ მიერ გამოქვეყნებულ კვლევას ზაზა მელიქიძე სიცრუეს უწოდებს: „ეს არ არის სწორი ინფორმაცია, აბსოლუტურად ყველა წილი გასხვისებულია და იქ ჩემი კომპანიები არ არის. მმართველობაში გადაცემულია ეს კომპანიები“.

მისივე თქმით, კვლევას არასწორი ინტერპრეტაცია მიზამიმართულად მიეცა: „როცა საქმე ძალიან კარგად კეთდება ახალციხეში, ეს ვიღაცებს არ მოსწონთ, რომ ქვეყანა აღმავლობისკენ მიდის და უნდათ რომ არასწორი ინტერპრეტაცია მისცენ. გამოძიება ყველაფერს გასცემს პასუხს“.

[თაკო ფეიქრიშვილი, ახალციხე]