მესხეთის თეატრში ეროვნული დრამატურგიის ფესტივალი დასრულდა

ავთანდილ ვარსიმაშვილის დადგმული სპექტაკლი "ხომ ხოცავენ ქანცგაწყვეტილს ცხენებს" ეროვნული დრამატურგიის ფესტივალის ფარგლებში გამართული 14 წარმოდგინიდან ბოლო იყო.

"თბილისის გარდა სპექტაკლი ბევრგან არ დამიდგამს, მაგრამ ეს ერთ–ერთი ჩემი საყვარელი სცენა, საყვარელი თეატრი და ქალაქია. მადლობა იმისთვის, რომ მოგვეცით საშუალება პრემიერა თქვენთან გვეთამაშა. ვისურვებდი, რომ ფეხბედნიერი ყოფილიყოს ეს სპექტაკლი", – განაცხადა წარმოდგენის დასრულების შემდეგ რეჟისორმა ავთანდილ ვარსიმაშვილმა.

იგი ერთ–ერთია მათ შორის ვინც მესხეთში ეროვნული დრამატურიის ფესტივალს საფუძველი ჩაუყარა.

"იგი ჩვენი უახლოესი მეგობარია. ეს იმითაც დადასტურდა, რომ პრემიერა მესხეთის თეატრში გამართა, – ამბობს მესხეთის თეატრსი სამხატვრო ხელმძღვანელი ლია სულუაშვილი – იმედია 14 წარმოდგენით ჩვენმა მაყურებელმა ძალიან დიდი სიამოვნება მიიღო"

წარმოდგენის დასრულების შემდეგ მადლობა ვარსიმაშვილს ახალციხის მერმა გიორგი კოპაძემაც გადაუხადა: "ახალციხელების სახელით, აქ მყოფი მაყურებლის სახელით ამ სანახაობისთვის უდიდესი მადლობა გადაგიხადოთ. წარმოდგენა ძალიან მომეწონა და დარწმუნებული ვარ დიდი წარმატებაც ექნება".

შეგახსენებთ, წელს, ეროვნული დრამატურგიის მესამე თეატრალურ ფესტივალში საქართველოს სხვადასხვა ქალაქის 14 თეატრი მონაწილეობდა. სამი კვირის განმავლობაში მაყურებლისთვის სპექტაკლებს მართავდნენ: თბილისის, გორის, რუსთავის, ჭიათურის, ქუთაისის, ფოთის, სოხუმის და მესხეთის თეატრის დასები.

ეროვნული დრამატურგიის თეატრალური ფესტივალი ქალაქ ახალციხის მერიისა და კულტურისა და ძეგლთა დაცვის სამინისტროს ფინანსური მხარდაჭერით იმართება.



[sknews.ge]