თვითმმართველობებმა 2020 წლის ბიუჯეტის პროექტებზე მუშაობა დაიწყეს

რა თანხით განისაზღვრება თითოეულ მუნიციპალიტეტის მომავალი წლის ბიუჯეტი, მერიებს ჯერ ზუსტად განსაზღვრული არ აქვთ, თუმცა მათი ნაწილი ამბობს, რომ თანხები გასულ წელთან მცირედით, თუმცა მომატებული იქნება.

რაც შეეხება, 2020 წლის მთავარ პრიორიტეტებს, რაზეც მერიები ყურადღებას გაამახვილებენ, ასპინძაში, ახალქალაქსა და ბორჯომში გვიხსნიან, რომ ისევ ინფრასტრუქტურული პროექტების განხორციელება იქნება.

„ჩვენთვის, მთავარი პრიორიტეტი სავარაუდოდ გზების კეთილმოწყობა იქნება და სხვა ინფრასტრუქტურული პროექტები. ჯერ ყველაფერი დაწვრილებით გაწერილი არ გვაქვს, რადგან დიდი ხანი არ არის რაც დავიწყეთ პროექტზე მუშაობა“, – გვითხრეს ახალქალაქის მერიის საფინანსო სამსახურში.

სხვა მუნიციპალიტეტებისგან განსხვავებით, ადიგენში მთავარი პრიორიტეტი სოციალური სფერო იქნება. მუნიციპალიტეტში ამბობენ, რომ მომავალ წელს ყველაზე აქტიურად სოცილური და ჯანდაცვის მიმართულებით იმუშავებენ.

რაც შეეხება ახალციხესა და ნინოწმინდას. მერიებში გვითხრეს, რომ 2020 წლის ბიუჯეტის პროექტზე მუშაობა უკვე დაწყებული აქვთ, თუმცა ამ ეტაპზე კონკრეტულ პრიორიტეტებსა თუ თანხაზე საუბრისაგან თავს იკავებენ.

რეგიონის მუნიციპალიტეტებმა, მომავალი წლის მთავარი ფინანსური დოკუმენტი 15 ნოემბრამდე უნდა მოამზადონ და საკრებულოებს განსახილველად გადაუგზავნონ. თითქმის ორთვიანი განხილვებისა თუ კორექტირებების შემდეგ, თვითმმართველობის კოდექსის მიხედვით, საბოლოოდ ბიუჯეტი დეკემბრის ბოლოსთვის უნდა დამტკიცდეს.

[ლუბა გიორგაძე, ახალციხე]