"სამცხე–ჯავახეთისა და ქვემო ქართლის სომხური საზოგადოებრივი ორგანიზაციების საბჭო" საქართველოს სახელმწიფო ენის სტანდარტების დარღვევის შემთხვევაში ჯარიმების დაწესების თემას ეხმაურება.
საბჭომ დღეს, 4 ოქტომბერს გაავრცელა მიმართვა, რომელშიც ნათქვამია, რომ საქართველოს მეცნიერული წრეების საკანონმდებლო ინიციატივას საქართველოს პარლამენტის განათლების კომიტეტი გამოეხმაურა, რაც იმ ვარაუდის საბაბს იძლევა, რომ კანონპროექტი ახლო მომავალში კანონის ძალას მიიღებს. და, შესაბამისად, გავრცელდება როგორც სახელმწიფო სტრუქტურებში მომუშავე პირებზე, ასევე მასობრივი ინფორმაციის საშუალებებსა და საზოგადოებრივ-პოლიტიკურ ორგანიზაციებზე.
"შეგახსენებთ, რომ ამ პროცესის გამოვლინებები ჯერ კიდევ 2012წ ხელისუფლების შეცვლის დროს დაფიქსირდა, როდესაც ბ.ივანიშვილის გუნდის წარმომადგენლებმა გამოაცხადეს ე.წ. "ენის ჟანდარმერიის" შექმნის აუცილებლობაზე.
იმის გათვალისწინებით, რომ საქართველოში არსებობს მთელი რიგი რეგიონებისა, რომლის მოსახლეობას არაქართველი მოქალაქეები წარმოადგენენ, ხოლო საქართველოს ხელისუფლებას დღემდე არ მოუწერია ან რატიფიცირება არ მოუხდენია იმ საერთაშორისო ხელშეკრულებებისა, რომელიც მკვიდრი მოსახლეობისა და ეთნიკური უმცირესობების ენობრივი უფლებების დაცვას უკავშირდება, მეტიც - ის ნორმები, რომელსაც საქართველო შეუერთდა პრაქტიკაზე დღემდე არ არის განხორციელებული, შემუშავებულ არ არის შესაბამისი კანონმდებლობა. ამ ფონზე აღნიშნული პროცესი (ახალი კანონპროექტი) უშუალო გავლენას იქონიებს საქართველოს შემადგენლობაში შემავალ მთელ რიგ რეგიონებზე, მათ შორის სამცხე-ჯავახეთისა და ქვემო ქართლის მოსახლეობაზე", - ნათქვამია საბჭოს მიმართვაში.
"სამცხე–ჯავახეთისა და ქვემო ქართლის სომხური საზოგადოებრივი ორგანიზაციების საბჭო" მიიჩნევს, რომ საერთაშორისო ვალდებულებების არშესრულებისა და კანონმდებლობის არასრულყოფილების პირობებში, ქართული ხელესუფლების მსგავსი ნაბიჯები, აღნიშნულ რეგიონებში, მოსახლეობის ღელვას, ქართული ხელისუფლების მიმართ უნდობლობას გამოიწვევს.გარდა ამისა, გაღრმავდება ჯავახეთის ეთნიკური სომხების იზოლაცია სახელმწიფო ინსტიტუტებისგან.
"აღნიშნული და სხვა უარყოფითი პროცესების თავიდან ასაცილებლად, სამცხე-ჯავახეთისა და ქვემო ქართლის სომხური საზოგადოებრივი ორგანიზაციების საბჭო, საქართველოს ხელისუფლებას მოვუწოდებთ საკუთარ პროგრამებში თავი აარიდოს ორმაგი სტანდარტების აღსრულებას და ამგვარი პროცესების დაწყებასთან მიმართებაში დაუყოვნებლივ გახადოს განხილვის თემად რეგიონში სომხური ენისთვის რეგიონალური სტატუსის მინიჭება. ამით საქართველოს ახალი ხელისუფლება დაამტკიცებს, რომ ის ჭეშმარიტად დემოკრატიულია, არ გადაუხვია გამოცხადებულ პოლიტიკურ კურსს და ამით განსხვავდება წინამორბედი ხელისუფლებისგან.
მოვიდა დრო ვაღიაროთ, რომ ჯავახეთის მკვიდრი ათასობით სომეხი მოქალაქე გადასახადების ისეთივე გადამხდელია, როგორც ქვეყნის ქართველი მკვიდრი მოსახლეობა და მას ისეთივე უფლება აქვს ადმინისტრაციულ და სახელმწიფო დონეზე დაიცვას საკუთარი მშობლიური ენა, როგორც დღეს ცდილობთ ქართული ენის დაცვას. აი ეს არის ნამდვილი დემოკრატია!"- ნათქვამია მიმართვაში.
[sknews.ge]