„შეღავათიანი აგროკრედიტის პროექტის“ ფარგლებში სამცხე-ჯავახეთში 152 სესხი გაიცა

საქართველოს სოფლის მეურნეობის სამინისტროს პროექტების სამმართველოს ინფორმაციით სამცხე-ჯავახეთში „შეღავათიანი აგროკრედიტის პროექტის“ მეორე და მესამე კომპონენტში 1,796,900 ლარი გაიცა. აქედან მესამე კომპონენტში გაცემულია 934,000 ლარი და მეორეში კი 862,900 ლარი.

მესამე კომპონენტში შეღავათიანი აგროკრედიტით 10-მა მეწარმემ ისარგებლა. აქედან 4 მიღებულ თანხას რძის გადამამუშავებელ საწარმოს მოახმარს, 3 მესაქონლეობას. ამავე კომპონენტში თითო-თითო სესხია გაცემული მეთევზეობაზე, მეცხვარეობასა და შერეული საქმიანობაზე.

142 სესხი გაიცა მეორე კომპონენტში. მათ შორის, 112 მესაქონლეობაზე, 13 მებოსტნეობაზე, 4 მეფუტკრეობაზე, 5 მეთევზეობაზე, 1 სასათბურე მეურნეობაზე, 1 მარცვლეულის წარმოებაზე, 5 შერეულ საქმიანობაზე, 1 მეცხვარეობაზე.

„ეს 3 ოქტომბრის მონაცემებია, სესხით სარგებლობის საშუალება კიდევ ბევრ ფერმერს ექნება. რაც შეეხება პირველ კომპონენტს ეს ჩვეულებრივ განვადებებია“, - განუმარტეს „სამხრეთის კარიბჭეს“ საქართველოს სოფლის მეურნეობის სამინისტროს პროექტების სამმართველოში.

შეგახსენებთ, რომ „შეღავათიანი აგროკრედიტის პროექტი“, რომელსაც "სოფლისა და სოფლის მეურნეობის განვითარების ფონდი" აფინანსებს და “სოფლის მეურნეობის პროექტების მართვის სააგენტო” ახორციელებს, საქართველოს პრემიერ-მინისტრის დავალებით, სოფლის მეურნეობის სამინისტრომ შეიმუშავა. პროექტი მიმდინარე წლის მარტში დაიწყო. იგი სამი კომპონენტისგან შედგება: 1. უპროცენტო სასაქონლო კრედიტი (განვადება) მცირე ფერმერებისთვის - 0%; 2. შეღავათიანი აგრო კრედიტი საშუალო და მსხვილი ფერმერებისთვის - არაუმეტეს 8%-ის (საბრუნავი საშუალებების და მარაგების შესყიდვის დაფინანსება მოკლე ვადით) და 3. შეღავათიანი აგრო კრედიტი სასოფლო - სამეურნეო საწარმოებისთვის არაუმეტეს 3%-ის (ძირითადი საშუალებების და ტექნოლოგიების დაფინანსება ხანგრძლივი პერიოდით).

[sknews.ge]