წნისში სამაცივრე მეურნეობა გაიხსნა

სამაცივრე მეურნეობისთვის ახალი შენობა აშენდა, რომელიც აღიჭურვა თანამედროვე სამაცივრე დანადგარებით. სამაცივრე მეურნეობაში 120 ტონამდე მოსავლის შენახვაა შესაძლებელი. კომპანიამ პროექტის ფარგლებში სასოფლო-სამეურნეო ტრაქტორი და მისაბმელი აგრეგატი შეიძინა.

წნისში ახალი საწარმო სოფლის მეურნეობის პროექტების მართვის სააგენტოს დირექტორის მოვალეობის შემსრულებელმა მარიანა მორგოშიამ, მხარის გუბერნატორმა აკაკი მაჭუტაძემ და საერთაშორისო ორგანიზაციების წარმომადგენლებმა დაათვალიერეს.

შპს „ჯორჯიან ბიზნესს ზონამ“ სამაცივრე მეურნეობა სოფლის მეურნეობის პროექტების მართვის სააგენტოს „შეღავათიანი აგროკრედიტის პორექტის და USAID/REAP-ს დახმარებით ააშენა.
პროექტის ფარგლებში კომპანიამ 244,071 აშშ დოლარის იაფი სესხი, ხოლო USAID/REAP - ისგან 98,277 აშშ დოლარის დახმარება მიიღო.

შპს „ჯორჯიან ბიზნესს ზონ“-ა 2008 წელს დაარსდა და საქართველოში სოფლის მეურნეობის მიმართულებით სხვადასხვა პროექტებს ახორციელებს. კომპანიამ საწარმოში 45 ადამიანი დაასაქმა, მათი სერვისით ადგილობრივი 350 ფერმერი სარგებლობს.
შპს „ ჯორჯიან ბიზნესს ზონ“-ამ ფერმერთა ტრეინინგ ცენტრიც გახსნა, სადაც სისტემატურად ხდება დაინტერესებული პირების გადამზადება. კომპანია საერთაშორისო სტანდარტების შესაბამისად მუშაობს და მინიჭებული აქვს აისო და ჰასპის სერთიფიკატები.

სოფლის მეურნეობის სამინისტროს ინიციატივით, სოფლის მეურნეობის პროექტების მართვის სააგენტო „შეღავათიანი აგროკრედიტის პროექტს“ 2013 წლის მარტის ბოლოდან ახორციელებს. 27 ოქტომბრის მონაცემებით გაცემულია 587,845,294 ლარი 22,683 სესხზე. პროექტის ფარგლებში გაიხსნა 89 ახალი საწარმო, გადაიარაღდა და გაფართოვდა 580 საწარმო.




[Sknews.ge]