ურავლის გზაზე, წვიმის დროს, კლდიდან ქვები ცვივა [ფოტო]

ურავლის გზაზე, კლდიდან ქვები ბოლოს ორი დღის წინ, 28 სექტემბერს ჩამოცვივდა. შემთხვევის შედეგად არავინ დაშავებულა და არც ტრანსპორტი დაზიანებულა, თუმცა, ადგილობრივები ამბობენ, რომ პრობლემა აქ მუდმივად არსებობს და საფრთხის შემცველია.

„უკვე მერამდენედ ჩამოცვივდა კლდიდან ნაშალი! ვიდრე აქ უბედურება არ მოხდება, ყურადღებას არავინ არ მოგვაქცევს“, – გვეუბნება ერთ–ერთი მძღოლი, რომელსაც გზაზე გავლა თითქმის ყოველდღე უწევს.

ახალციხის მუნიციპალიტეტის მერიაში გვითხრეს, რომ შპს „კეთილმოწყობის“ თანამშრომლები, 28 სექტემბერს კლდიდან ჩამოყრილი ქვებისგან გზას დღეს, 30 სექტემბერს დილიდან წმენდენ: „კლდეებს, იმ მონაკვეთებზე, რომელიც საფრთხის შემცველია, ქვებს აცლიან და მუდმივად არის ერთი წარმომადგენელი, რომელიც საქმის კურსშია და აკვირდება გზის მდგომარეობას“.

ურავლის გზაზე, კლდიდან ქვების ცვენის ეს პირველი შემთხვევა არ არის. პრობლემასთან დაკავშირებით „სამხრეთის კარიბჭეს“ არაერთი მასალა აქვს მომზადებული. იგივე პრობლემაა ასპინძა–ახალქალაქის ცენტრალურ გზაზეც.

ამავე თემაზე:

ასპინძა–ახალქალაქის ცენტრალურ გზაზე კლდიდან ლოდები ცვივა



[ლუბა გიორგაძე, ახალციხე]