ახალციხეში სოხუმის დაცემის დღე გაიხსენეს

დაღუპულთა მემორიალთან ომის მონაწილეები, სამხარეო ადმინისტრაციისა და თვითმმართველობის წარმომადგენლები შეიკრიბნენ.

„დღეს მართლაც ტრაგიკული დღეა ჩვენი ქვეყნის ისტორიაში. პატივს მივაგებთ ჩვენს გმირებს, ჩვენს ვაჟკაცებს, რომლებმაც ყველაზე მთავარი, სიცოცხლე დათმეს სამშობლოსთვის. რამდენი 25 წელიც არ უნდა გავიდეს ჩვენ ამ ტკივილს და იარას ვერ მოვიშუშებთ. დარწმუნებული ვარ, რომ ამ ადამიანების დაღვრილი სისხლი უკვალოდ არ ჩაივლის და ჩვენი სამშობლო ისევ ერთიანი იქნება“, – ამბობს სამცხე–ჯავახეთის გუბერნატორი ბესიკ ამირანაშვილი.

გარდაცვლილთა სულების მოსახსენიებლად ივლიტის ღვთისმშობლის შობის ტაძრის წინამძღვარმა იოანემ პარაკლისი გადაიხადა.

„ბოლო შეტევა, რომ მოიტანეს სოხუმზე, ადიგენელ ბიჭებთან ერთად იქ ვიყავი. აქედან გაგვატანეს ხალხის შეგროვებული პროდუქტი და ის ჩავიტანეთ. მძიმე ტექნიკა და არტილერია ყველაფერი გამოყვანილი იყო უკვე ქალაქიდან და მხოლოდ ავტომატებით ვიცავდით თავს. მიუხედავად იმისა, რომ წელიწადი და ერთი თვე ვერ შეძლეს სოხუმის აღება ბოლოს მაინც დაეცა“, – ამბობს ვეტერანი დავით ფეიქრიშვილი.

აფხაზეთის ომში სამცხე–ჯავახეთიდან 14 ჯარისკაცი დაიღუპა.







[მარიამ ბარძიმაძე, ახალციხე]