ახალქალაქში ჩეკების გათამაშების რეკლამირება არ ხდება, ჩეკების შემოწმების მეთოდებს ადგილობრივი ტელევიზია არ აჩვენებს, ცენტრალურ არხებს კი მოსახლეობის დიდი ნაწილი არ უყურებს. შედეგად, ბევრმა გათამაშების შესახებ საერთოდ არაფერი იცის ან თუ იცის, ჩეკებს არ ამოწმებს, რადგან მოგების არ სჯერა ან სულაც არ იცის, ჩეკი როგორ მოწმდება.
“სამხრეთის კარიბჭეს” მიერ გამოკითხული 15 ახალქალაქელიდან ჩეკებს მხოლოდ ორი ამოწმებს, შვიდმა გათამაშების შესახებ არაფერი იცის, ექვსმა კი იცის, მაგრამ სხვადასხვა მიზეზების გამო არ თამაშობს.
ადამიანებს არ სჯერათ, რომ შეიძლება 10-დან 50,000 ლარამდე თანხა მხოლოდ ერთი ჩეკით თუ შევლენ საქართველოს ფინანსთა სამინისტროს შემოსავლების სამსახურის ვებ-გვერდზე წწწ.რს.გე ან აკრეფენ ტელეფონზე *200¹-ს და მესიჯის ტექსტში ჩეკზე ამობეჭდილ ორ ციფრულ კომბინაციას შეიყვანენ. რეკლამისა და შესაბამისად, ინფორმაციის არქონის გამო ადგილობრივი მოსახლეობა მაღაზიებში ჩეკებს ძირითადად არ ითხოვს.
- “ჯერჯერობით კეთილსინდისიერად ვამოწმებ. ჩეკებს ხან მაძლევენ, ხან არა. ჩეკს არასდროს ვითხოვ, თუ მომცემენ კარგია, თუ არა, ეგეც არაფერი”, - ამბობს ანი მინასიანი.
ზოგისთვის ახალი ამბავი იყო ისიც, რომ გამყიდველისთვის ჩეკის მოთხოვნა მისი უფლებაა.
- “ზოგ მაღაზიაში ჩეკებს მაძლევენ, ზოგან არა. ამას ნაკლებ ყურადღებას ვაქცევდი, არც არასდროს მომითხოვია”, - ამბობს ახალქალაქის მცხოვრები იურა კარაპეტიანი.
ასეთ პირობებში გამყიდველები სხვადასხვანაირად იქცევიან. დიდი მაღაზიების დაქირავებული თანამშრომლები, რომლებიც ადრე ჩეკს პაკეტში ყოველთვის დებდნენ, ახლა კლიენტებს ჩეკებს აღარ აძლევენ. პატარა მაღაზიაში კი ჩეკებს ადრეც იშვიათად აძლევდნენ კლიენტს. ახლა, თუ მოითხოვ, ჩეკს აუცილებლად მოგცემენ, თუმცა, ერთგვარი უკმაყოფილებით.
- “ახლახანს ერთ მაღაზიაში და ერთ აფთიაქში (სახელწოდებებს გასაგები მიზეზების გამო არ ვასახელებთ “ს.კ.”) რაღაცეები შევიძინე და ტელეფონის ანგარიშზე თანხაც ჩავრიცხე. ფულის ჩასარიცხ აპარატთან ჩეკს არ დავლოდებივარ, მაღაზიაში და აფთიაქში მოცემული ჩეკები პაკეტში ჩავდე, სახლში კი აღმოვაჩინე, რომ ჩეკების მხოლოდ ზედა ნაწილები მოუციათ და არა ის მხარე, სადაც ციფრული კოდებია დაბეჭდილი. აღმოჩნდა, რომ მათ უბრალოდ მოახიეს ეს ნაწილი და ჩვეულებრივი ქაღალდის ნაგლეჯი მომცეს, თითქოს ჩეკი იყო”, - ამბობს ახალქალაქის მკვიდრი ანჟელა ანატოლიანი.
შეგახსენებთ, რომ ჩეკების გათამაშება 18 აპრილს დაიწყო და წლის ბოლომდე გაგრძელდება. ამ პერიოდის განმავლობაში საქართველოს ფინანსთა სამინისტრო 9 მლნ ლარს გაათამაშებს. ფულის მოგების შემთხვევაში უნდა მიმართოთ “ლიბერთი ბანკის” ან “პრივატ ბანკის” ნებისმიერ ფილიალს (ახალქალაქში მხოლოდ ეს ბანკებია, საქართველოს დანარჩენ ტერიტორიაზე კი ჩეკით მოგებული თანხის განაღდება “ბაზისბანკსა” და “კორ სტანდარტ ბანკში” შეიძლება). თანხის მიღება ჩეკის გაცემიდან 30 დღის განმავლობაშია შესაძლებელი.
ამ გათამაშების მეშვეობით მთავრობა გეგმავს მოსახლეობის მხრიდან გამყიდველთა კეთილსინდისიერების კონტროლს, თუმცა, როგორც ჩანს, ეს ყველგან ვერ ხერხდება.
[ქრისტინა მარაბიანი, ახალქალაქი]