რას ამბობენ გამათბობლების მაღაზიებში ტექნიკოსების კვალიფიკაციაზე

გაზის გამათბობლები და წყლისგამაცხელებლები ქალაქის თითქმის ყველა ელექტროსაქონლის მაღაზიაში იყიდება. თუმცა, აქვე ისიც უნდა ითქვას, რომ ქალაქში ასეთი სულ რამდენიმე მაღაზიაა.

მაღაზია ’ელ-ჯი’-ში გაზის გამათბობლების ფართო არჩევანია. ’ელ-ჯი’-ს მენეჯერი გრიშა ბაბაიანი ამბობს, რომ ძირითადად უკრაინული, ჩეხური და ქართული ’კერას’ გამათბობლები შემოაქვთ. მყიდველის სურვილის შემთხვევაში მათგან წაღებულ გამათბობელს მათივე ხელოსანი ამონტაჟებს. ბაბაიანი ვერ იხსენებს, მათ მაღაზიაში მომუშავე ტექნიკოსი სად გადამზადდა.

- ’არ ვიცი სად ისწავლა, მაგრამ კარგად აკეთებს’,- ამბობს იგი.

მაღაზია ’ელიტ-ელექტრონიქსში’ პრესასთან საუბრისგან თავს იკავებენ. პირად საუბარში გვიხსნიან, რომ მათთან გაზის ტექნიკოსი შპს ’საგა იმპექსმა’ გადაამზადა. მაღაზია კლიენტს გარანტიის საბუთს არ აძლევს, ვიდრე მათი ტექნიკოსი უსაფრთხოებას არ გადაამოწმებს. მათი ტექნიკოსი ამოწმებს უსაფრთოხებას იმ შემთხვევაშიც, თუ მყიდველმა გამათბობელი არა ამავე მაღაზიის წარმომადგენელს, არამედ ვინმე სხვას დაამონტაჟებინა. ასეთ დროს, ’ელიტ-ელექტრონიქსის’ ტექნიკოსი დამონტაჟებული გამათბობლის გადამოწმების შემდეგ აძლევს კლიენტს გარანტიის დამადასტურებელ დოკუმენტს.

’სამხრეთის კარიბჭემ’ ტექნიკოსების კვალიფიკაციის დადგენა ქალაქის კიდევ ორ მაღაზიაში სცადა.

’ბეკოში’ ახალი თანამშრომელი დაგვხვდა, რომელმაც კითხვებზე ვერ გვიპასუხა იმ მოტივით, რომ ახლახანს დაიწყო მუშაობა, დროებით და დეტალებში გარკვეული არ არის. მაღაზიის მენეჯერი ადგილზე არ დაგვხვდა.

პაატა ნათენაძის ქუჩაზე მდებარე ელექტროტექნიკის მაღაზიაში კი გვითხრეს, რომ მათთან კლიენტს მხოლოდ შეძენა შეუძლია. მაღაზიას ტექნიკოსები არ ჰყავს და მყიდველს ამ მომსახურებას ვერ სთავაზობენ.

[თინათინ ზაზაძე, ახალციხე]