უკანონო გარევაჭრობას ახალქალაქში 'გაგებით ეკიდებიან'

ქალაქის ცენტრალურ მოედანზე, მესროპ მაშტოცის ძეგლთან, ასევე ახალქალაქის მუნიციპალიტეტის გამგეობის მეზობლად არა მუდმივად, მაგრამ მაინც ,ათას წვრილმანს შეიძლება წააწყდეთ.

ახალქალაქის ცენტრალურ ქუჩებში მტვერში, გამონაბოლქვ აირში, ანტისანიტარიაში, ავტომობილების საბარგულებიდან ან პირდაპირ ტროტუარებზე ვაჭრობენ: ფეხსაცმლით, ტანსაცმლით, საკვებითა და ათასი წვრილმანი ნივთით. აქვე არიან შეკრებილი მყიდველები თუ უსაქმოდ გაჩერებული ხალხი. ხშირად ასეთი მინი „საცობების“ გამო გამვლელებს ქუჩის სავალ ნაწილზე გადასვლა უწევთ.

ტროტუარებზე ათას წვრილმან ნივთს ძირითადად ჩამოსული მოვაჭრეები ყიდიან. ადგილობრივი მცხოვრებლები კი სპეციალურად ამ მიზნისთვის გამოყოფილ ადგილას ვაჭრობენ, რომელსაც „ბაზრობას“ ეძახიან. უკანონო გარე ვაჭრობა, კონკურენციის არათანაბარი პირობების გამო, ხშირად მაღაზიებისა და „ბაზრობის“ გამყიდველთა გაღიზიანებას იწვევს.

ახალქალაქში გარე ვაჭრობას ადგილობრივი ხელისუფლება არ არეგულირებს. ახალქალაქის მუნიციპალიტეტის გამგეობაში აგვიხსნეს, რომ გარე ვაჭრობის რეგულირებით ახალქალაქის მუნიციპალიტეტის საკრებულოა დაკავებული.

ახალქალაქის მუნიციპალიტეტის საკრებულოს თავმჯდომარემ განგვიმარტა, რომ შესაბამისი კანონი მიღებული არ არის და გარე ვაჭრობას ვერაფერს მოუხერხებენ, რადგან სამინისტროებისგან შესაბამისი განკარგულებები არ არსებობს.

„ამ კანონს ჯერჯერობით საქართველოს პარლამენტი განიხილავს. როდესაც შესაბამის დოკუმენტს მივიღებთ, რომ ქუჩებში ვაჭრობა უნდა შეწყდეს, მერე გადავდგამთ ნაბიჯებს. არამხოლოდ ახალქალაქში, არამედ მთელ საქართველოშია ეს პრობლემა. აქ გასათვალისწინებელია მოსახლეობის მძიმე სოციალური მდგომარეობა. ერთ დროს წინა ხელისუფლებამ ამ მიმართულებით გარკვეული სამუშაოები ჩაატარა და შედეგად მოსახლეობის მხრიდან დიდი უკმაყოფილება გამოიწვია“, – ამბობს ახალქალაქის მუნიციპალიტეტის საკრებულოს თავმჯდომარე ჰამლეტ მოვსისიანი.

თუმცა საქართველოს ადმინისტრაციული კოდექსისა და 2006 წლის შესწორებების მიხედვით, საქართველოში გარე ვაჭრობა დასჯადი სამართალდარღვევაა.

ფიზიკური ან იურიდიული პირები შეიძლება დაჯარიმდნენ 20 ლარით საქონლის კონფისკაციასთან ერთად; დაუმორჩილებლობის შემთხვევაში მოვაჭრე შეიძლება დაჯარიმდეს 50 ლარით ან თავისუფლების აღკვეთით 7 დღემდე საქონლის კონფისკაციასთან ერთად; განმეორებით შემთხვევაში ჯარიმის თანხა საქონლის კონფისკაციასთან ერთად 100 ლარს აღწევს.

საქართველოს ზოგიერთ ქალაქში, მათ შორის დედაქალაქშიც, გარე ვაჭრობა უკვე აკრძალულია.

[ქრისტინა მარაბიანი, ახალქალაქი]