ბორჯომის ‘თორმა’ დაფინანსების მიღების შემდეგ პირველი ადგილი დაკარგა

საფეხბურთო კლუბი „თორი“ რეგიონულ ლიგაში ასპარეზობს. გუნდმა ჩემპიონატის მიმდინარე ეტაპი ზედიზედ ოთხი გამარჯვებით დაიწყო და 12 ქულით ცხრილის პირველ ადგილზე იმყოფებოდა. წარმატებული სტარტის შემდეგ კი ზედიზედ რამდენიმე მატჩი წააგო.

26 ივლისს ბორჯომის საკრებულომ გუნდის ერთჯერადად დაფინანსების გადაწყვეტილება მიიღო. მერიის ინფორმაციით, გუნდს 30 000 ლარი 29 აგვისტოს ჩაერიცხა.

მიღებული დაფინანსება გუნდის მთავარი მწვრთნელის თქმით, ფეხბურთელებს წაახალისებდა და ცხრილში პირველი ადგილის შენარჩუნებაში დაეხმარებოდა: „ჩვენი მიზანია, წელს პირველ ადგილზე გავიდეთ და ძირითადი გუნდი შევინარჩუნოთ", - გვითხრა ვასილ ფირცხალავამ 12 აგვისტოს.

თუმცა მიღებული დაფინანსების დღეს ბორჯომელები „ცხუმთან“ ანგარიშით 5-1 დამარცხდნენ, ოთხ სექტემბერს „ჰერეთთან“ საშინაო მატჩში ფრეს დასჯერდნენ, 11 სექტემბერს კი სტუმრად „თბილისი 2016-თან“ 6-0 დამარცხდნენ და პირველი ადგილი დაკარგეს.

წარუმატებლობის მიზეზებსა და სამომავლო გეგმებზე სასაუბროდ „სამხრეთის კარიბჭე“ გუნდის მთავარ მწვრთნელთან დაკავშირება სცადა, თუმცა ვასილ ფირცხალავამ სატელეფონო ზარებს არ უპასუხა.

ამჟამად ბორჯომელები მეოთხე ადგილზე იმყოფებიან და პირველ ადგილზე მყოფ „35-ე საფეხბურთო სკოლას“ რვა ქულით ჩამორჩებიან.

[ავთო ინასარიძე, ბორჯომი]