'სამხრეთის კარიბჭეს' ჟურნალისტები სამუშაო ვიზიტით ამერიკაში იმყოფებოდნენ

„სამხრეთის კარიბჭეს“ ოთხი თანამშრომელი, 12–დან 16 აგვისტოს ჩათვლით, აშშ–ს სამ ქალაქში ათამდე ონლაინ გამოცემის ოფისში, რადიოსა და ტელევიზიაში „საქართველოს მედიაპარტნიორობის პროგრამის (GMPP)” ფარგლებში იმყოფებოდა. ისინი ექვსი დღის განმავლობაში, ამერიკული მედიის მუშაობას გაეცვნენ და მათი გამოცდილება გაიზიარეს.

შეხვედრები გაიმართა ვირჯინიის ქალაქ რიჩმონდის ოთხ მედია საშუალებაში, ტელევიზიაში, რადიოსა და ონლაინ გამოცემაში, ასევე ვაშინგტონის ოთხ მედია ორგანიზაციაში, მათ შორის, IREX–ის სათაო ოფისში, სადაც მედიის წარმომადგენლებთან პანელური დისკუსია მოეწყო მედიაწიგნიერების საკითხებზე.

ამერიკაში ვიზიტის ბოლო ეტაპი ნიუ-ორკი იყო, სადაც „სამხრეთის კარიბჭეს“ თანამშრომლები სამ მედია ორგანიზაციის ჟურნალისტებსა და ხელმძღვანელ პირებს შეხვდნენ, მათ შორის CNN-ისა და „ამერიკის ხმის“ წარმომადგენლებს.

“პროგრამის ოთხი მონაწილე გაეცნო ადგილობრივი მედიაორგანიზაციების მუშაობის სპეციფიკას და ამერიკული მედიის მიერ გამოყენებულ თანამედროვე მიდგომებს, ციფრული კონტენტის, ვიდეოს და პოდკასტების წარმოების, ვებგვერდისა და სოციალური ქსელების პლატფორმების მართვის, მარკეტინგისა და გაყიდვების კუთხით. მათ მიიღეს ბევრი საინტერესო რჩევა, საჭირო ინფორმაცია და თემატური მასალა ამერიკელი კოლეგებისგან"_ ამბობს პროგრამის დირექტორი მაია მათეშვილი.

ვიზიტის ფარგლებში, „სამხრეთის კარიბჭეს“ თანამშრომლები საკუთარი მიმართულებების მიხედვით, სხვადასხვა მედიაორგანიზაციებში მიღებულ გამოცდილებას ქართულ რეალობას მოარგებენ და „სამხრეთის კარიბჭეს“ სოციალურ, მარკეტინგისა და ჟურნალისტური კონტენტის გაძლიერებისთვის გამოიყენებენ.

პროგრამაში მონაწილეობა, „სამხრეთის კარიბჭეს“ მთავარმა რედაქტორმა თიკო ზაზაძემ, ჟურნალისტმა ლუბა გიორგაძემ, მარკეტინგის მენეჯერმა თეონა მაისურაძემ და სოციალური მედიის მენეჯერმა ოთარ აწყურელმა მიიღეს.

„საქართველოს მედიაპარტნიორობის პროგრამა“ საქართველოში გაგრძელდება. „სამხრეთის კარიბჭე“ სექტემბერში ამერიკის ტელეკომპანია NBC12–ის ციფრული კონტენტის ხემძღვანელს ქეით ოლბრაიტსა და მარკეტინგის, მენეჯმენტის, ბიზნესის განვითარებისა და სარეკლამო დარგში გრეკ ბროკს უმასპინძლებს, რის შემდეგაც „სამხრეთის კარიბჭეში“ ამერიკელი კოლეგების კიდევ ერთი ვიზიტი დაიგეგმება.





[sknews.ge]