'სამხრეთის კარიბჭეს' გუნდი უკრაინაში, მედიაინოვაციების ლაბორატორიაში მიიღებს მონაწილეობას

კონკურსის შედეგად საქართველოში, მოლდოვასა და უკრაინაში შერჩეული მედიასაშუალებები, რომლებიც 2017 წლის 16-18 ნოემბერს მონაწილეობას მიიღებენ მულტიმედიური ინოვაციების ლაბორატორიაში, ქალაქ კიევში, 27 ოქტომბერს დასახელდა.

კონკურსში, რომელიც პროექტის „დამოუკიდებელი მედიის გაძლიერება საქართველოში, მოლდოვასა და უკრაინაში“ ფარგლებში გაიმართა, სამი ქვეყნის 32 გუნდი მონაწილეობდა. საკონკურსო ჟიურიმ სამი მონაწილისგან შემდგარი ცხრა გუნდი შეარჩია (სამი გუნდი თითო ქვეყნიდან, სულ, 27 მონაწილე) მათი გამოცდილების და საპროექტო იდეების ინოვაციურობის და ინტერაქტიულობის საფუძველზე.

ეს გუნდები შემდეგ მედიასაშუალებებს წარმოადგენენ:

საქართველო:

• IFact.ge
• Newscafe.ge, Radio Gipa
• Sknews.ge

მოლდოვა

• Moldova.org
• Locals.md
• Canal Regional

უკრაინა

• Hromadske.Kremenchuk
• Tvoye Misto
• Hromadske.Kharkiv

სამდღიანი მულტიმედიური ინოვაციების ლაბორატორიის ფარგლებში მონაწილეები გაეცნობიან ინტერნეტსივრცეში თამაშის (gamification) პრინციპებს და გააუმჯობესებენ საპროექტო იდეებს გამოცდილი ტრენერების ხელმძღვანელობით. თითოეული ქვეყნიდან ერთი გამარჯვებული საპროექტო იდეა დაფინანსდება 2000$ ოდენობის გრანტით.

ლაბორატორიის ფარგლებში გაიმართება ვებგვერდის უნივერსალური შაბლონის პრეზენტაცია, რომელიც აგებულია ღია კოდის კონტენტის მართვის სისტემაზე (cms) და შექმნილია მცირებიუჯეტიანი ადგილობრივი მედია საშუალებებისთვის. შაბლონი დაინტერესებულ მედიასაშუალებებს უფასოდ გადაეცემა.

მულტიმედიური ინოვაციების ლაბორატორიის ორგანიზატორია არასამთავრობო ორგანიზაცია “ინტერნიუსი - უკრაინა”, “ინტერნიუსი-საქართველოსთან” და “დამოუკიდებელი ჟურნალისტიკის ცენტრთან” ერთად. ღონისძიება ხორციელდება პროექტის “დამოუკიდებელი მედიის გაძლიერება საქართველოში, მოლდოვასა და უკრაინაში“ ფარგლებში, რომელიც მიზნად ისახავს ინფორმაციის ხელმისაწვდომობის გაზრდას და მედიაწიგნიერების ხელშეწყობას საქართველოში, მოლდოვასა და უკრაინაში.

[sknews.ge]