ტიმოთესუბნის ტაძარში სათავსო უნებართვოდ ჩააშენეს

სააგენტოში ამბობენ, რომ მათ ინფორმაცია კერძო პირებმა შეატყობინეს. თანამედროვე ტიპის სათავსო ღვთისმშობლის მიძინების სახელობის სამონასტრო კომპლექსის მთავარ ტაძრშია ჩაშენებული.

„საზოგადოების რიგითი წევრების მიერ მთავარ ტაძარში თანამედროვე სამშენებლო მასალით აგებული სათავსო დაფიქსირდა, რომელიც ინტერიერში თვითნებურადაა დამონტაჟებული. მოწოდებული ფოტომასალაზე სააგენტოს სპეციალისტების პირველადი შეფასებით, საყოფაცხოვრებო დანიშნულების მქონე სათავსო ეროვნული კატეგორიის სტატუსის მქონე უძრავი ძეგლის ინტერიერის ვიზუალურ მხარესთან სრულ შეუსაბამობაშია და მის კულტურულ ღირებულებას ხელყოფს“, – ნათქვამია სააგენტოს განცხადებაში.

სააგენტოს ზედამხედველობის სამსახურის ჯგუფი ტიმოთესუბანში გამგზავრებას 20 აგვისტოს გეგმავს. ისინი უნებართვოდ განხორციელებული სამუშაოების შედეგებს სამართლებრივად შეაფასებენ.

სააგენტოს ინფორმაციით, მონიტორინგის ვიზიტის მსვლელობაში სხვა სასულიერო პირებთან ერთად ჩაერთვება ადგილობრივი ეპარქიის მღვდელმთავარი, რომლის განმარტებით, აღნიშნული ქმედების შესახებ არც ეპარქიას და არც საქართველოს საპატრიარქოს ინფორმაცია არ ჰქონია.

„სამუშაო ჯგუფის სპეციალისტები კულტურული მემკვიდრეობის ძეგლზე განხორციელებული სამუშაოების ზეგავლების ხარისხს შეისწავლიან და ადგილობრივ სასულიერო პირებს მის დემონტაჟს მოსთხოვენ. ზედამხედველობის სამსახურის ჯგუფის მიერ მომზადებულ ანგარიშს კულტურული მემკვიდრეობის დაცვის ეროვნული სააგენტო უახლოეს დღეებში გაასაჯაროებს“, – ნათქვამია განცხადებაში.

ბორჯომის სოფელ ტიმთესუბანში სამონასტრო კომპლექსი XI-XVII საუკუნეების ქართული ხუროთმოძღვრების ძეგლს წარმოადგენს, რომლის მთავარი ნეგაბობაა XII-XIII საუკუნეების ღვთისმშობლის მიძინების სახელობის ტაძარი.



[თაკო ფეიქრიშვილი, ბორჯომი]