გურკელში ნაპოვნი ჭურჭელი გვიანი შუა საუკუნეების ქვევრია

სააგენტოს ინფორმაციით, ახალციხის სოფელ გურკელში, წყლის სისტემის რეაბილიტაციისას აღმოჩენილი დიდი ზომის ჭურჭელი ქვევრია, თუმცა იგი ისტორიულად მნიშვნელოვან ობიექტს არ წარმოადგენს.

„განსაკუთრებული არქეოლოგიური მნიშვნელობა არ აქვს, მაგრამ გადავწყვიტეთ, მისი იერ-სახე შევინარჩუნოთ. ჩვენი რეკომენდაციის საფუძველზე, ამ ქვევრს ამოუშენდება დამცავი კედელი და ზემოდან ლუქი გაუკეთდება“, - განმარტავს კულტურული მემკვიდრეობის დაცვის სააგენტოს საზოგადოებასთან ურთიერთობის სამსახურის წარმომადგენელი ბექა ბარამიძე.

სოფელ გურკელში ქვევრი სასმელი წყლის რეზერვუარის სარეაბილიტაციო სამუშაოების დროს, 31 მაისს აღმოაჩინეს. მისი სიმაღლე დაახლოებით სამი მეტრია, სიგანე კი – ორი მეტრი.

ჭურჭლის შესწავლამდე, ადგილობრივები მიიჩნევდნენ, რომ იგი ქვევრის ტიპის სათავსო იყო. მას შემდეგ, რაც ადგილზე არქეოლოგებმა იმუშავეს, აღმოჩნდა, რომ იგი „ქვევრია, რომელიც გვიანი შუა საუკუნეებისთვის იყო დამახასიათებელი“.

[თაკო ფეიქრიშვილი, ახალციხე]