დიდ პამაჯში ხანძარი ლიკვიდირებულია [ფოტო/ვიდეო]

დღეს, 14 აგვისტოს ახალციხის სოფელ დიდ პამაჯში ხანძარი დაახლოებით 14:50 საათზე გაჩნდა. მისი ლიკვიდირება კი დაახლოებით ოთხ საათში მოხდა: „არავინაა დაშავებული, ხანძარი ლიკვიდირებულია“, - განმარტავენ საგანგებო სიტუაციების სამსახურში.

ხანძრის დროს, ადგილზე მობილიზებული იყო შვიდი სახანძრო მანქანა და 30 მეხანძრე-მაშველი. ადგილობრივი თვითმმართველობის წარმომადგენლები ზარალს ითვლიან.

დამწვარი ოთხი სახლისა და სათავსო-ნაგებობების მეპატრონეები ამჟამად საქართველოში არ ცხოვრობენ. მეზობლების ინფორმაციით, ისინი რუსეთში სამშოდ არიან წასულები. ცეცხლის გაჩენისას სოფელში სახანძრო ადგილობრივებმა გამოიძახეს.

„აქ სახლები მჭიდროდაა დასახლებული, ერთ სახლში გაჩნდა და მეორეს გადაედო. დაიწვა ოთხი სახლი, სამი სათავსო და ბოსელი, რომელიც უფუნქციო იყო, იმიტომ, რომ მისი პატრონები აქ არ ცხოვრობენ“, - ამბობს ინგა ერემიანი, რომელმაც სახანძრო-სამაშველო სამსახურში დარეკა.

რამ გამოიწვია ხანძარი, მეზობლები ვერ საუბრობენ.



შემთხვევის დროს, ადგილზე იმყოფებოდნენ ახალციხის მუნიციპალიტეტის მერი და საკრებულოს თავმჯდომარე. მათი თქმით, თვითმმართველობა ეცდება ზარალი აანაზღაუროს.

„მოხდება შესწავლა. ჩვენთვის ცნობილია, რომ ამ სახლების ნაწილი წლების მანძილზე იყო დაკეტილი, თუმცა ეს სახლები რეგისტრირებულია ჩვენს მუნიციპალიტეტში. შესაბამისი კომისია იმსჯელებს, იმუშავებს და შეძლებისდაგვარად ყველას აღმოუჩენთ დახმარებას“, - განაცხადა ახალციხის მუნიციპალიტეტის მერმა ზაზა მელიქიძემ.

დამწავარი შენობებისგან მიყენებული ზარალის ანაზღაურებას გეგმავენ ახალციხის მუნიციპალიტეტის საკრებულოშიც - „ვისი სახლებიცაა ის პიროვნებები რუსეთში არიან წასულები. არავინ არაა ახლა სოფელში. დამწვარ თივაზე არ ვიცი, მაგრამ დამწვარი შენობებისათვის მიყენებულ ზარალს ავანაზღაურებთ“, - გვითხრა ახალციხის საკრებულოს თავმჯდომარემ გელა ნოზაძემ.















[თორნიკე ზაზაძე, გიორგი ლონდარიძე - ახალციხე]