სოფელ ურაველთან, ფერდობზე ხანძარი ლიკვიდირებულია

სოფელ ურავლიდან ერთ კილომეტრში, ფერდობზე გაჩენილი ხანძრის ლიკვიდირება მეხანძრეებმა დაახლოებით ნახევარი საათის წინ შეძლეს. მათთან ერთად ცეცხლის ჩაქრობის სამუშაოებში ადგილობრივებიც იყვნენ ჩართულნი.

„სრულად ჩავაქრეთ, არცერთი კერა აღარ არის დარჩენილი, ყველა წამოვედით ტერიტორიიდან“,–გვითხრა თემის საკრებულოს თავმჯდომარის მოადგილემ გელა ნოზაძემ, რომელიც ხანძრის ლიკვიდაციაში მონაწილეობდა.

საგანგებო სიტუაციების მართვის სამსახურის ინფორმაციით, სოფელ ურავლის მიმდებარედ 1,5 ჰექტარი ფართობი დაიწვა. ადგილზე 4 სახანძრო ჯგუფი მუშაობდა.

შეგახსენებთ, ურაველთან, ხანძარი დღეს, 25 აგვისტოს გაჩნდა. ცეცხლი სოფლის მიმდებარე ტერიტორიაზე მინდორში, ბუჩქნარს მოედო.

შინაგან საქმეთა სამინისტროში ამბობენ, რომ საქმეზე ძიება სსკ–ს 187–ე მუხლით მიმდინარეობს, რაც ნივთის დაზიანება ან განადგურებას გულისხმობს.

[sknews.ge]