ახალციხელმა თამთა პეტაშვილმა ლიეტუვის სახელმწიფო დაფინანსება მოიპოვა

თამთა პეტაშვილი ლიეტუვაში, ვილნიუსის უნივერსიტეტში „ევროკავშირის ბიზნეს სამართალზე“ ისწავლის და მაგისტრის დიპლომს მიიღებს.

„ვფიქრობ, ეს ჩემთვის მნიშვნელოვანი ეტაპია, ლიეტუვურ ენას სამი წელი ვსწავლობდი, ამის შემდეგ ავიღე სერტიფიკატი და ლიეტუვის განათლების სამინისტრომ მიმიჩნია ღირსეულ კანდიდატად, ლიეტუვის ყველაზე პრესტიჟულ, ვილნიუსის უნივერსიტეტში სასწავლებლად“, - ამბობს თამთა.

მას ლიეტუვის განათლებისა და მეცნიერების სამინისტროს ფონდი სასწავლო პროგრამას 4 000 ევროთი დაუფინანსებს, 400 ევრო კი სტიპენდია ექნება.

სწავლის დასრულების შემდეგ, ცოდნის საკუთარ ქვეყანაში გამოყენება სურს: „ვფიქრობ ცოდნა, რომელიც ბიზნეს ურთიერთობებს ევროკავშირის ქვეყნებს შორის ეხება, ჩვენი ქვეყნისთვის უმნიშვნელოვანესია, ამიტომ ვაპირებ, რომ ცოდნის მიღების შემდეგ საქართველოში დავბრუნდე“.

თამთა პეტაშვილი ამბობს, რომ მისთვის მნიშვნელოვანია საგარეო პოლიტიკური მიღწევები და მეგობარ ქვეყანას სამაგალითოდ მიიჩნევს: „ლიეტუვა მოკლე დროში გახდა ნატოსა და ევროკავშირის წევრი, ვფიქრობ, ჩვენი ბევრი გვაქვს მათგან სასწავლი. ენის შესწავლასთან ერთად, მიწევდა მათ კულტურასაც გავცნობოდი, ჩვენ უნდა ავიღოთ მათგან მაგალითები“.

თამთა პეტაშვილმა ახალციხის N5 საჯარო სკოლის დაამთავრა, შემდეგ კი სწავლა საქართველოს ტექნიკური უნივერსიტეტში, სამართლის ფაკულტეტზე გააგრძელა.

სწავლები კიდევ ერთ საფეხურს იგი ლიეტუვაში გაივლის.



[ავთო ინასარიძე, ახალციხე]