‘ფეხბურთელების 90% დავითხოვეთ’ - რა ბედი ეწევა კლუბ ‘ბორჯომს’

კლუბის დირექტორი და ყოფილი მთავარი მწვრთნელი, კობა თედიაშვილი გუნდის დაშლას გამორიცხავს.

„საფეხბურთო სეზონის დაწყებამდე გუნდი სრული შემადგენლობით იქნება მზად. 10 თებერვლის შემდეგ დავიწყებთ ახალ ფეხბურთელებთან კონტრაქტის გაფორმებას“ - ამბობს კობა თედიაშვილი.

მისივე თქმით, ფეხბურთელების გუნდიდან გაშვების ერთ–ერთი მიზეზი, წინა სეზონზე წარუმატებელი თამაში გახდა.

მომავალი სეზონიდან შეიცვლება კლუბის მთავარი მწვრთნელიც. გუნდს სკ „ცხინვალის“ ყოფილი მწვრთნელი, მალხაზ ლაცაბიძე უხელმძღვანელებს.

კობა თედიაშვილი ასევე განმარტავს, რომ გუნდის დაფინანსების და მომავალ სეზონზე თამაშის ბედს დიდწილად ფედერაციის სხდომა გადაწყვეტს, რომელიც მომდევნო კვირაშია ჩანიშნული. „სამ თებერვალს ჩანიშნულია აღმასკომის სხდომა, ამის შემდეგ შემეძლება სხვა დეტალებზეც საუბარი. არის იმის შანსიც, რომ გუნდმა კვლავ მესამე ლიგაში იასპარეზოს. ახლა მეტს ვერაფერს გეტყვით“.

„ბორჯომმა“ გასულ სეზონზე, მესამე ლიგაში ათი გუნდიდან მეცხე ადგილი დაიკავა. წესების მიხედვით, მეცხე და მეათე ადგილოსნები რანგით დაბალ, მეოთხე ლიგაში გადადიან.

გუნდი მომავალ სეზონზე მეოთხე ლიგაზე იასპარეზებს. ახალი საფეხბურთო სეზონი, მესამე და მეოთხე ლიგებისთვის გაზაფხულზე დაიწყება.

[რობი ზარიძე, ბორჯომი]