ახალქალაქის ციხის რესტავრაციამდე კონცეფცია მომზადდება

როგორც კულტურული მემკვიდრეობის დაცვის სააგენტოს დირექტორი ნიკოლოზ ანთიძე აცხადებს, მიმდინარე წელს, ახალქალაქის ციხის დეტალური კონცეფციის ჩამოყალიბება მოხდება, რომლის მიხედვითაც განისაზღვრება, სად უნდა ჩატარდეს არქეოლოგიური გათხრები და სად კონსერვაცია, ასევე დაიგეგმება გაწმენდითი სამუშაოები, რომლიც შემდეგაც მოხდება რესტავრაცია.

„ეს ციხე ხელწამოსაკრავი არ არის, ამიტომ დეტალურად უნდა გავიაროთ ყველა მიმართულება, უნდა შევიმუშაოთ ერთიანი კონცეფცია და სამუშაოები ისე დავიწყოთ“,–აცხადებს ნიკოლოზ ანთიძე და ამატებს, რომ ციხეზე სამუშაოები 2020 წელს დაიწყება.

სააგენტოს დირექტორმა ნიკოლოზ ანთიძემ, ახალქალაქის ციხე მიმდინარე წლის პირველ მაისს მოინახულა. მაშინ ადგილობრივ თვითმმართველობას შეუთანხმდა, რომ სამუშაოების დაწყებამდე, ციხე ისე უნდა ჩაეკეტათ, რომ ტერიტორაზე ტრანსპორტი ან პირუტყვი არ შესულიყო.

ახალქალაქის მერის, იური უნანიანის თქმით, ციხის შესასვლელი ჯაჭვებით ჩაიკეტა და მსურველებს აქ შესვლა მხოლოდ ფეხით შეუძლიათ.

„იქ მეჩეთია და ღია კარები ჰქონდა, სადაც მარტივად შედიოდა პირუტყვი, ამიტომ ეს შესასვლელიც ჩავკეტეთ, სააგენტოსთან შეთანხმებით. ახლა დანარჩენი სამუშაოები თვითონ სააგენტომ უნდა შეასრულოს“, – გვითხრა იური უნანიანმა.

ისტორიული წყაროების მიხედვით, ახალქალაქის ციხე XI საუკუნეში აიგო. XV საუკუნეში იგი სრულიად დანგრეულა. XVII საუკუნეში კი კვლავ აღადგინეს და ოსმალების დაქვემდებარებაში შედიოდა. სავარაუდოა, რომ ციხის ეზოში არსებული მეჩეთიც ამავე პერიოდში აიგო.



[ლუბა გიორგაძე, ახალქალაქი]