ნიკოლოზ ანთიძე: 'ვარძიაში სარესტავრაციო სამუშაოები მარტიდან განახლდება'

გაზაფხულიდან ვარძიის ღვთისმშობლის სახელობის ტაძარში სარესტავრაციო სამუშაოებს იმ ეტაპიდან გააგრძელებენ, სადაც გასული წლის ზამთარში ძლიერი ყინვის გამო შეწყვიტეს.

„ვარძიაში სარესტავრაციო სამუშაოები პირველი მარტიდან განახლდება. აქ ჯერ მუშაობას ქართველი სპეციალისტები დაიწყებენ, მოგვიანებით კი მათ ლონდონის უნივერსიტეტის კურტოს ხელოვნების ინსტიტუტის წარმომადგენლები შეუერთდებიან“, – ამბობს „სამხრეთის კარიბჭესთან“ კულტურული მემკვიდრეობის დაცვის ეროვნული სააგენტოს ხელმძღვანელი ნიკოლოზ ანთიძე და ამატებს, რომ ამ დრომდე ვარაძიაში მუშაობა ძლიერი ყინვების გამო ვერ ხერხდებოდა.

მისი თქმით, ის სამუშაოები, რაც ვარძიაში მარტის პირველ რიცხვებში ჩატარდება, უცხოელ ექსპერტებთან უკვე შეთანხმებული და დეტალურად გავლილია: „სარესტავრაციო სამუშაოების შემდეგ ეტაპობრივად დაიწყება საკონსერვაციო სამუშაოები“.

შეგახსენებთ, ღვთისმშობლის სახელობის ტაძარში ხანძარი პირველ ნოემბერს, ღამით გაჩნდა. რის გამოც ქრისტეს ცხოვრების 17 ეპიზოდი, მათ შორის თამარისა და გიორგი მესამის უნიკალური კედლის მხატვრობა, შავი ფერით დაიფარა.

[თამუნა უჩიძე, ასპინძა]