ახალციხის სკოლების დირექტორებთან საინფორმაციო შეხვედრა გაიმართა

10 –დან 20 აგვისტოს ჩათვლით, პრაქტიკოს პენსიონერ პედაგოგებს შეუძლიათ გაცხადების დაწერა და სკოლის დატოვება. ჯილდოების გაცემის მეორე ეტაპი კი 27 დეკემბრის ჩათვლით გაგრძელდება.

„თუ პედაგოგი მუშაობს ერთ ან მეტ სკოლაში, მაგალითად სამში, სამივე სკოლიდან მიეცემა ანაზღაურება, ბოლო სამი თვის ხელფასის ოდენობა,საშემოსავლო გადასახადის გარეშე, შემდეგ ეს მრავლდება 24 თვეზე. აიღებს ორი წლის ხელფასს. თუ ჯილდოს აღების შემდეგ პრაქტიკოსი პენსიონერი პედაგოგი ორი წლის მანძლზე გადაწყვეტს დაბრუნდეს სკოლაში, ის ვალდებულია, რომ ეს ჯილდო მთლიანად დააბრუნოს. თუკი ორი წლის მერე გადაწყვეტს, რომ სკოლაში დაბრუნება უნდა, ეს შეუძლია, ოღონდ კომპეტენცია დადასტურებული“, –ამბობს მასწავლებელთა ეროვნული განვითარების ცენტრის პროექტის „ასწავლე საქართველოსთვის“ მენეჯერი ლალი წიკლაური.

მისივე თქმით, სულ რამდენიმე დღეში ახალი ვებ–გვერდი pedagogi.ge ამოქმედდება, რომლის მეშვეობითაც, პედაგოგებს საშუალება ექნებათ უკვე ვაკანტური პოზიციების განთავსება, ასევე მაძიებელ პედაგოგებს შეეძლებათ ამა თუ იმ სკოლაში განაცხადის შევსება.

სანამ, დირექტორები ვაკანსიებს გამაოცხადებენ, მანამდე სკოლაში შიდა კონკურსისა და საათების გადანაწილების პროცესი დაიწყება. იმ შემთვევაში, თუ რომელიმე საგნის პედაგოგი გახდება საჭირო, დეფიციტური ვაკანსიას დირექტრები ამ ვებ–გვერდზე განათავსებენ.

ეს პროცესიც, როგორც ცენტრის წარმომადგენელი ამბობს, დაჩქარებული წესით უნდა მოხდეს, რადგან სწავლა სექტემბერში დაიწყება.

21–დან 24 აგვისტომდე, დირექტორებმა უნდა მოახერხონ და ახლადშექმნილ საიტზე ვაკანსიები განათავსონ. 27 აგვისტომდე შესული განაცხადების გადარჩევა, შერჩევა და გასაუბრება განხორციელდება. 27 აგვისტოს ქალაქის სკოლას უკვე უნდა ჰქონდეს კადრები შერჩეული, ხოლო სოფლის სკოლებში ვადა 31 აგვისტომდე აქვთ.

საიტზე დარეგისტრირება შეუძლიათ ბაკალავრისა და მაგისტრის ხარისხის მქონე პიროვნებას, მაძიებლის სტატუსით. მათ ორი წლის ვადაში უნდა გაიარონ კურსი და გახდნენ კვალიფიციურები.

როგორც ახალციხის N1 საჯარო სკოლის დირექტორი ჟუჟუნა გოგოლაური ამბობს, ამ ეტაპზე, მის სკოლას ორი პენსიონერი მასწავლებელი ტოვებს. თუმცა მასთან დეფიციტური პოზიცია არ დარჩება, რადგან საათებს სხვა მასწავლებელებს გადაუნაწილებს.

„ჩემი სკოლის მაგალითზე შემიძლია გითხრათ, რომ ბევრი მასწავლებელი მყავს, რომელიც არაა საათებით დაკმაყოფილებული. შიდა კონკურსების საფუძველზე მოვიძევთ მასწავლებლებს და შევავსებთ ვაკანსიას. გვყავს პედაგოგები, რომელბსაც დადასტურებული აქვთ კომპეტენცია. ჩვენთან ეს დეფიციტი არ შეიქმნება“,– ამბობს გოგოლაური.

მასწავლებელთა ეროვნული განვითარების ცენტრის წარმომადგენელმა მსგავსი შეხედრები სამცხე–ჯავახეთის ყველა მუნიციპალიტეტში გამართა.



[მარიამ ბარძიმაძე, ახალციხე]