ევროკავშირი სამცხე-ჯავახეთში არსებულ ვითარებას სწავლობს

საქართველოში ევროკავშირის წარმომადგენლობის პოლიტიკის განყოფილების ხელმძღვანელის მოადგილე რენატა ვრუბელი პრეზიდენტობის კანდიდატების რეგიონში მოქმედ შტაბებს და ადგილობრივ თვითმმართველობებს ესტუმრა. ასევე, შეხვდა იმ არასამთავრობო ორგანიზაციების წარმომადგენლებს, რომლებიც არჩევნებს აკვირდებიან.

„თბილისიდან დანახული წინასაარჩევნო გარემო რეგიონებში სხვაა და ადგილზე, შენი თვალით ნანახი, სხვა", - ამბობს ვრუბელი.

იგი რეგიონში არსებულ წინასაარჩევნო ვითარებას ასე აფასებს: „კმაყოფილებით მინდა აღვნიშნო, რომ წინა არჩევნებისგან განსხვავებით ახლა ბევრად უფრო მშვიდი და თვისუფალი გარემოა. თუმცა, არც ახლა ხდება ისე, რომ ხალხმა არჩევანი პრეზიდენტობის კანდიდატის წინასაარჩენო პროგრამით გააკეთოს“.

ევროკავშირის წარმომადგენელი, ჭელაში მინარეთს დემონტაჟთან დაკავშირებით ვითარებაში უკეთ გარკვევის მიზნით, ადგილობრივ მუსლიმებს, მუფთს, იმამს, ასევე ადიგენში მოქმედი არასამთავრობო ორგანიზაცია „საზოგადოებრივი დარბაზის“ წარმომადგენელსა და მართლმადიდებლების აქციის ერთ-ერთ ორგანიზატორს გოდერძი კუბლაშვილს შეხვდა.

„ვეცადეთ ყველა მხარეს შევხვედროდით. კარგი ის არის, რომ ამაზე მეტად არ გართულდა ვითარება ჭელაში, ცუდი კი ისაა, რომ სოფლის შერეულ თემში ურთიერთობები დაიძაბა, არადა გვერდიგვერდ ცხოვრობენ, ერთ მერხზე სხედან მათი შვილები, სოფელში ერთი მხარე მეორე მხარეს წვეულებაზე აღარ ეპატიჟება და ა.შ.“, - აცხადებს იგი.

ვრუბელი "სამხრეთის კარიბჭესაც" ესტუმრა. იგი გაზეთისა და სააგენტოს მუშაობითა და ასევე, ჭელაში განვითარებული მოვლენებისა და რეგიონში არსებული წინასაარჩევნო ვითარების შესახებ "სამხრეთის კარიბჭეს" თანამშრომლების მოსაზრებებით დაინტერესდა.

[sknews.ge]