ბაგა-ბაღები ზაფხულში და მშობლების სამზადისი სექტემბრისთვის

აგვისტოში ახალციხის მუნიციპალიტეტში მდებარე 25 ბაგა–ბაღიდან 18 არ მუშაობს.

ქალაქ ახალციხეში რვა ბაღიდან, ბავშვების მიყვანა სამ მათგანში შეგიძლიათ, ესენია N5, N3, და N6 ბაგა–ბაღები, რაც შეეხება სოფლებს 17–დან აგვისტოში მხოლოდ ოთხი ბაღი მუშაობს: ვალეს, აწყურის, სხვილისის და მინაძის.

საზაფხულო ბაღში მოსახვედრად აუცილებელია ახალციხის მუნიციპალიტეტის სკოლამდელი აღზრდის დაწესებულებაში მისვლა და განაცხადის შევსება. მშობლებმა რეგისტრაციის დროს თან უნდა იქონიონ ბავშვის დაბადების მოწმობის ასლი, პირადი ნომრით.

თაკო ჩიხლაძეს თავის სამი წლის ბავშვი N1 ბაგა-ბაღში დაჰყავს, მისი ბაღი იასვენებს, ამიტომ აგვისტოს გატარებას აბასთუმანში აპირებს.

„მე ისედაც მაქვს სურვილი, რომ ბავშვმა ჩვენთან – მშობლებთან ერთად გაატაროს დრო და დაისვენოს ერთი თვე“, – ამბობს თაკო ჩიხლაძე.

რაც შეეხება იმ ბავშვებს, რომლებიც სექტემბრიდან პირველად მიდიან ბაგა–ბაღებში, მათი რეგისტრაცია ივლისის ბოლომდეა შესაძლებელი.

„სექტემბერში მშობლები წარადგენენ შესაბამის საბუთებს ( ბავშის ჯანმრთელობის ცნობა, ფოტო სურათი, მშობლების ქორწინების მოწმობის ასლი) და რეგისტრაციის შემდეგ, პატარებს შეუძლიათ მოვიდნენ ბაღში,“ – გვიხსნის პირველი საბავშვო ბაღის მენეჯერი ციცო საანიშილი.

სახელმწიფო ბაგა-ბაღებში, ჩვეულებრივ, 10 ჯგუფია და თითოში 29–დან 35 ბავშია. პედაგოგების რაოდენობა კი – 20. თითო ჯგუფში ორი აღმზრდელია. ბაღი დილის 08:30 საათიდან 18:30-მდე მუშაობს.

ქალაქ ახალციხეში მხოლოდ ერთი კერძო ბაგა-ბაღია, სადაც შესაძლებელია ბავშვების მიყვანა 10 თვიდან. კერძო ბაღში სულ ორი ჯგუფია. პირველში პატარები არიან – წლინახევრის ასაკამდე, მეორეში – წლინახევრის ზევით, ხუთ წლამდე. თითო ჯგუფში 12 ბავშვია და ბაგის ბავშვებს ჰყავთ სამი ძიძა, ხოლო ბაღის ბავშებს – ორი.

„მშობლებს ხელს ვუწყობთ და, შესაბამისად, დილით ცხრის ნახევარზე ბაგა-ბაღი უკვე ღიაა. საღამოს ექვსამდე ვმუშაობთ, მაგრამ განსაზღვრული ზუსტი დრო არ გვაქვს, შეიძლება ბავშები რვამდეც იყვნენ,“ - ამბობს ბაგა-ბაღის დამფუძნებელი დარეჯან ინასარიძე.
კერძო ბაღში გადასახადი ბავშვზე 180 ლარია, თვეში. იმ შემთხვევაში, თუ მშობელი უქმეებზეც ბაგა-ბაღში დატოვებს ბავშვს, მას თანხის დამატება მოუწევს. საათი ლარ ნახევრიდან ორ ლარამდე ღირს.

ახალციხის კერძო ბაგა-ბაღი სექტემბრიდან დამატებით ჯგუფს ხსნის მოსწავლეებისთვის.

„სკოლის შემდეგ მოვლენ ბავშვები, ვამეცადინებთ და ვასადილებთ, ეს კი 100 ლარი დაუჯდება მშობლებს“ – დარეჯან ინასარიძე. „ახალციხის მუნიციპალიტეტში მთლიანად 25 ბაგა-ბაღია, აქედან ახალციხეში – 8, დანარჩენი 17 კი – სოფლებში.

[ნათია გულიაშვილი, ახალციხე]