თვითმმართველობა აცხადებს რომ მუნიციპალიტეტში ამორტიზებული გზები აღარ იქნება

ადიგენის მუნიციპალიტეტის სოფელ ზემო ენთლის მოსახლეობა ამბობს, რომ სოფელ შოყაში საავტომობილი გზის რეაბილიტაციის დროს, მძიმეტონიანი მანქანების გადაადგილებამ მათ სოფელში ასფალტის ამორტიზება გამოიწვია.

„ზოგან ამოიყარა ასფალტი, ზოგან ღრმულები გაჩნდა. გამოდის რომ ტრასა აღარ გვაქვს“ – ჩივიან სოფელში.

ქვემო ენთელი, ზემო ენთელი და ფხერო ამ მიმართულებით ეს სამი სოფელი მდებარეობს.

ადიგენის მუნიციპალიტეტის მერის მოადგილე არსენ ბალახაშვილი ამბობს, რომ ანალოგიურ მდგომარეობაში სხვა სოფლების გზებიცაა.

„სოფელ უდეშიც არის დაზიანებული გზა ნაწილობრივ, ბოლაჯურშიც, ხარჯამშიც. შემოვიარეთ, აღვწერეთ რა გვაქვს, სად რა დაზიანებებია მთლიანი მუნიციპალიტეტის მასშტაბით. ამაზე ვმუშაობთ და შემდეგ გამოვაცხადებთ ტენდერს, გზებზე პრობლემების აღმოფხვრისა და გასწორებისთვის“, – განაცხადა არსენ ბალახაშვილმა.

მისივე თქმით, რადგან კომპანიებს რომლებმაც აღნიშნული გზები გააკეთეს, საგარანტიო ორწლიანი ვადა გასული აქვთ, ამიტომაც ტენდერი ადგილობრივი ბიუჯეტიდან დაფინანსდება.



[გულო კოხოძე, ადიგენი]