სოფელ რუსთავში "მტკვარიჰესის" სამუშაო ტერიტორიის მახლობლად მიწა ჩავარდა

სოფელ რუსთავიდან 50 მეტრში, სასოფლო-სამეურნეო ნაკვეთებისკენ მიმავალ გზაზე, ადგილობრივებმა ხვრელი 18 ივლისს, საღამოს ნახეს. მიწა 80 მეტრზეა ჩავარდნილი და მათივე ვარაუდით, მის ქვეშ გადის „მტკვარი ჰესის“ გვირაბი, რომელიც კომპანიას სოფელ ზიკილიიდან რუსთავის გავლით გაჰყავს.

„წუხელ ვნახეთ ეს ხვრელი და კომპანიას ჩვენ თვითონ დავურეკეთ. არავისთვის საფრთხე არ შეუქმნია. მოვიდნენ კომპანიის წარმომადგენლები და აკეთებენ რაღაცას. ისე, ამ ჰესის გამო, ჩვენ წყლის პრობლემა შეგვექმნა“, - ამბობს სოფელ რუსთავის მკვიდრი ირაკლი სანდროშვილი.

ადგილი, სადაც ხვრელი გაჩნდა, ამ ეტაპზე „მტკვარი ჰესის“ თანამშრომლებმა შემოღობეს. კომპანიის დირექტორი „სამხრეთის კარიბჭესთან“ ამბობს, რომ ორმოში წყალი რომ არ ჩავიდეს, ადგილს გრუნტით ამოავსებენ. „ახალი მომხდარია ყველაფერი, შესაბამისად, ვიკვლევთ, გეოლოგიურად და გეოდეზიურად. პირველ რიგში უნდა შევავსოთ ეს ღრმული, რომ შიგ წყალი არ ჩავიდეს. როცა გამოვიკვლევთ ამას, შემდეგ უკვე გვეცოდინება, რატომ ჩავარდა მიწა“, - ამბობს „მტკვარი ჰესის“ დირექტორი ალექსანდრე ოქროშიძე.

კითხვაზე, არის თუ არა ეს გვირაბისთვის განკუთვნილი ტერიტორია, კომპანიის დირექტორი ამბობს, რომ ზუსტად არ იცის: „დაახლოებით კი, ის ტერიტორიაა, ზუსტად არ ვიცით იმიტომ, რომ გეოდეზიური კვლევა არ გვაქვს. გუშინ ჩამოიშალა ეს ყველაფერი და, შესაბამისად, ჯერ კვლევა არ დაგვიწყია“.





[ლუბა გიორგაძე, ასპინძა]