გურკელში აღმოჩენილ თიხის ჭურჭელს არქეოლოგები შეისწავლიან

სოფელ გურკელში აღმოჩენილი თიხის ჭურჭლის ფოტოები, ახალციხის მერიის თანამშრომლებმა კულტურული მემკვიდრეობის ძეგლთა დაცვის სააგენტოს გადაუგზავნეს. „ამოსულები იყვნენ სოფელში თვითმმართველობიდან, სურათები გადაუღეს და სპეციალისტებს გადაუგზავნიან. არქეოლოგები ჯერ არ მოსულან“, - ამბობს სოფელ გურკელში მერის წარმომადგენელი გრიგოლ ღამბაშიძე.

ძეგლთა დაცვის სააგენტოში ამბობენ, რომ სპეციალისტები გურკელში რამდენიმე დღეში ჩავლენ და სათავსოს შეისწავლიან: „წინასწარ ვერაფერს ვიტყვით, რომელი პერიოდისაა ან რა არის. რამდენიმე დღეში, არქეოლოგიური სამსახურის სპეციალისტები ჩავლენ ადგილზე და ნახავენ“.

თიხის ჭურჭელი, რომელიც მოყვანილობით ქვევრს ჰგავს, სასმელი წყლის რეზერვუარის სარეაბილიტაციო სამუშაოების დროს, 31 მაისს აღმოაჩინეს. მისი სიმაღლე, დაახლოებით, სამი მეტრია, სიგანე კი – ორი მეტრი.

ამ დროისთვის წყლის რეზერვუარის სამშენებლო სამუშაოები ამ მონაკვეთზე შეჩერებულია. ადგილობრივები ამბობენ, რომ გურკელი ძველ ნასოფლარზეა აშენებული. ამიტომ შესაძლებელია, ამ ტერიტორიაზე მიწაში დამარხული სხვა სიძველეებიც აღმოჩნდეს.

[თაკო ფეიქრიშვილი, ახალციხე]