‘მარტო არჩევნებზე ვახსენდებით’ – ნაქურდევში გზის რეაბილიტაციას ითხოვენ

ნაქურდევში ამბობენ, რომ ბოლო წლებში გზის მდგომარეობა უფრო და უფორო გაუარესდა და წვიმაში გავლა შეუძლებელი გახდა.

„საშინელი გზაა! ატალახდება და აქ სატვირთო მანქანებიც ძლივს ამოდიან, მსუბუქი მანქანები რამდენი ჩარჩენილა ტალახში“, – გვეუბნება ნაქურდევში მცხოვრები ია ხარაიშვილი.

ადგილობრივების თქმით, პრობლემა მხოლოდ სოფელთან მისასვლელი გზა არ არის, აქ გადაადგილება, მითუმეტეს უამინდობისას, შიდა ქუჩებზეც ჭირს: „სოფელში ბავშვს ვერ გაუშვებ, ისეთი მდგომარეობაა გზებზე. ჩვენს მთავრობას მხოლოდ არჩევნების დროს ვახსენდებით, ახლა არ აინტერესებთ, აქ რა ხდება.“

ადიგენის მუნიციპალიტეტის მერიაში აცხადებენ, რომ ნაქურდევის გზის რეაბილიტაციის საპროექტო სამუშაოებისათვის ჯერ ტენდერი გამოცხადდა და მისი დაპროექტება წელსვე დასრულდება, თუმცა გზის სარეაბილიტაციო სამუშაოები დაიწყება თუ არა, ინფრასტრუქტურის სამსახურში ამაზე პასუხი არ აქვთ.

„ჯერ გზა უნდა დავაპროექტოთ. წელსვე დავიწყებთ თუ არა სამუშაოებს, არ ვიცით, რადგან უნდა დავადგინოთ, რა თანხა იქნება საჭირო, მერე ის თანხა გვექნება მოსაძიებელი და შესაძლოა, ეს ყველაფერი წელს ვერ მოხდეს“, – განმარტავას ადიგენის მერიის ინფრასტრუქტურის სამსახურის უფროსი გოდერძი სხირტლაძე.

საპროექტო სამუშაოებისათვის მერიამ ტენდერი 47 297 ლარზე გამოაცხადა, ამ დროისათვის კი მიღებული წინადადებების შერჩევა–შეფასება მიმდინარეობს.

სოფელ ნაქურდევში 30–მდე კომლი ცხოვრობს, სოფელი ზღვის დონიდან 1160 მეტრზე მდებარეობს.

[ლუბა გიორგაძე, ადიგენი]