‘ვის რაში კითხავს ჩვენ რას ვაკეთებთ’– კორხში XIX საუკუნის ეკლესიის კედლებს ძალაყინით ანგრევენ [ფოტო/ვიდეო]

„ადგილობრივმა მოსახლეობამ გვთხოვა, რომ დაგვეწყო გადახსნილი კედლის დაშლა. კედლები ერთმანეთს 30 სმ–ით იყო დაშორებული. ჩამოვანგრევთ სადამდეც გახსნილია, ანუ ძირამდე. ძველი აშენებული რაცაა სულ გასაკეთებელია“, – გვითხრა სამუშაოების ზედამხედველმა იური ზედგინიძემ, - „რასაც ეს ხალხი გვეუბნება ვაკეთებთ. გვეტყვიან დაშალეთ დავშლით, ააწყვეთო, ავაწყობთ“.

სოფელში ჟურნალისტების გამოჩენამ ადგილობრივების გაღიზიანება გამოიწვია: „ვის რაში კითხავს ჩვენ რას ვაკეთებთ“.

ეკლესიის გვერდით მცხოვრებლები ამბობენ, რომ ტაძრიდან ქვები ცვიოდა, ამიტომაც მოსწონთ ძეგლის რეაბილიტაცია: ,,კარგია რაც კეთდება, ჩემი ბავშვები აქ თამაშობენ და არ ვიცით როდის დაინგრეოდა ეს შენობა, სულ მეშინოდა, ახლა კარგია, რომ ასე კეთდება“.

„რაც მახსოვს ასეა, აქედან ქვები ცვივა, ბავშვებს კინაღამ მოხვდათ. გვინდა რემონტი, რომ მსხვერპლი არ იყოს. ხალხი სიკეთეს აკეთებს და ეშმაკმა იცის მერამდენე ადამიანი მოვიდა და გვეკითხება ეკლესიის შესახებ და ვის რაში კითხავს რას ვაკეთებთ“, – ამბობს კორხში მცხოვრები შუახნის კაცი.



ადგილობრივების დაფინანსებით ეკლესიაზე სამუშაოები 12 მაისს დაიწყეს.

ძეგლზე უნებართვოდ დაწყებული სარეაბილიტაციო სამუშაოების ორგანიზებისთვის, კულტურული მემკვიდრეობის დაცვის სააგენტომ, ადგილობრივი იური წარუკიანი ჯერ გააფრთხილა, შემდეგ კი 5000 ლარით დააჯარიმა. მიუხედავად ამისა, კორხში სააგენტოს მოთხოვნა არ გაითვალისწინეს და სამუშაოები გააგრძელეს.

იურისტების განმარტებით, ამგვარი ქმედება სისხლის სამართლის დანაშაულის ნიშნებს შეიცავს.

ძეგლთა დაცვის სააგენტოში აცხადებენ, რომ კომენტარს ხვალ, 29 მაისს გააკეთებენ: „სამუშაო საათები დასრულებულია, ხვალ გავარკვევთ“.

კორხში მდებარე წმ.სტეფანეს (სურბ სტეფანოს) სახელობის ეკლესიას, კულტურული მემკვიდრეობის უძრავი ძეგლის სტატუსი 2017 წლის 30 ივნისს მიენიჭა.

XIX საუკუნის დარბაზული ტიპის ეკლესია სომხურ სამოციქულო ეკლესიას ეკუთვნის.











[გულო კოხოძე, ახალქალაქი]