ახალქალაქში დაკავებული ბიჭის მამა სამმართველოს უფროსს ხვდება

ორ მხარეს შორის შეხვედრა, სამმართველოში დღეს 25 მაისს, დაახლოებით 13:30 საათზე შედგა. დაკავებული კიმ კუგოიანის მამისა და „ნაცინალური მოძრაობის“ ადგილობრივი ორგანიზაციის თავმჯდომარის, აშოტ რაისიანის მოთხოვნა კუგოიანის გათავისუფლებაა.

სამმართველოსთან დილიდან 60–70 ახალგაზრდაა შეკრებილი. მათი მოთხოვნა დაკავებულის გათავისუფლებაა: „ჩვენ შეკრებილები ვართ აქ ერთადერთი მოთხოვნით, რომ უკანონოდ დაკავებული ბიჭი გაათავისუფლონ. ახლა ველოდებით მისი მამა გამოვიდეს სამმართველოდან და მერე გადავწყვეტთ დავიშალოთ თუ გავაგრძელოთ აქცია“, – ამბობენ შეკრებილები.

დაკავებულ კიმ კუგოიანი 2017 წლის დეკემბერში აცხადებდა, რომ სამცხე–ჯავახეთის პოლიციის თანამშრომლები ქვეყნის დატოვებას აიძულებდნენ, წინააღმდეგ შემთხვევაში, მის წინააღმდეგ საქმის „შეკერვითა“ და დაჭერით ემუქრებოდნენ.

სამცხე-ჯავახეთის პოლიციის დეპარტამენტის და განსაკუთრებულ დავალებათა დეპარტამენტის თანამშრომლებმა 1992 წელს დაბადებული კიმ კუგოიანი ახალქალაქის ცენტრალურ პარკში გუშინ, 24 მაისს დააკავეს.

უწყების ინფრომაციით, დაკავებული წარსულში მრავალჯერ ნასამართლევი, ე.წ. კრიმინალური ავტორიტეტია.

ცეცხლსასროლი იარაღის მართლსაწინააღმდეგო შეძენა, შენახვა, ტარების ფაქტზე გამოძიება სისხლის სამართლის კოდექსის 236-ე მუხლის მე-3 და მე-4 ნაწილებით მიმდინარეობს.

[sknews.ge]