ახალქალაქელი ახალგაზრდა ამბობს, რომ პოლიცია ქვეყნის დატოვებას აიძულებს

კიმ კუგოიანის შესახებ ინფორმაციას სააგენტო „ჯეინიუსი“ აქვეყნებს. როგორც რესპონდენტი გამოცემასთან ყვება, გუშინ, 5 დეკემბერს, ახალქალაქის პოლიციის თანამშრომლებმა იგი გააჩერეს, მანქანაში ჩაისვეს, 15 წუთი ჯერ ახალქალაქშივე ელაპარაკნენ, შემდეგ კი ახალციხეში, პოლიციის სამმართველოში გადაიყვანეს.

„ახალციხეში ნარკოტიკებზე შემამოწმეს. შემდეგ მითხრეს, რომ თუ 48 საათის განმავლობაში ქვეყანას არ დავტოვებ, ჩემს წინააღმდეგ საქმეს გააყალბებენ, შეიძლება გულისხმობენ იმას, რომ წარსულში ჩხუბის გამო ვარ ნასამართლევი. არ ვაპირებ ქვეყნის დატოვებას, რომ დავტოვო, ეს იქნება იმის დასტური, რომ დამნაშავე ვარ რაიმეში და გავიქეცი“, – უთხრა „ჯეინიუსს“ კიმ კუგოიანმა.

იგი ამბობს, რომ ყოველთვის, როდესაც ახალქალაქში ქურდობა ან ძარცვა ხდება, სამართალდამცავები პირველ რიგში მის ოჯახში მიდიან: „ბოლო ძარცვის შემდეგაც დილის შვიდ საათზე, 5–6 პოლიციელი მოვიდა. მათი მოსვლისასა გამეღვიძა, არც კი ვიცოდი რა მოხდა. 3–4 წლის წინაც, ქალაქში ძარცვა მოხდა და მე და ჩემი მეგობრები წაგვიყვანეს ახალციხეში, პოლიციაში, გვცემეს, საქმე ისე გააყალბეს, თითქოს ჩვენ პოლიციას წინააღმდეგობა გავუწიეთ და უცენზურო სიტყვებით მივმართეთ და 500 ლარით დაგვაჯარიმეს“.

კიმ კუგოანი, მისივე ნაამბობის მიხედვით, ხულიგნობისთვისაა ნასამართლევი.

საქართველოს შინაგან საქმეთა სამინისტროში „სამხრეთის კარიბჭეს“ განუცხადეს, რომ კიმ კუგოიანი გუშინ გადამოწმების მიზნით ახალციხეში ნამდვილად ჩამოიყვანეს, თუმცა, არაფერი აღმოაჩნდა და გაუშვეს. უწყებაში კატეგორიულად გამორიცხავენ კუგოიანის ამოჩემებას ან მასზე ზეწოლას და იძულებას, რომ ქვეყანა დატოვოს.

„მუქარას და მსგავს ფაქტს ადგილი არ ჰქონია“, – აცხადებენ უწყებაში.

კითხვაზე, რატომ გააჩერეს იგი, რატომ გადაწყვიტეს მისი გადამოწმება, შსს–ში ამბობენ, რომ მათ უფლება აქვთ ნებისმიერი ადამიანი გააჩერონ, გადაიყვანონ პოლიციის შენობაში და გადაამოწმონ.

[Sknews.ge]