ახალქალაქში იარაღის შეძენა-შენახვა-ტარებაში ბრალდებული გირაოთი გაათავისუფლეს

ფოტო: jnews.ge

ახალქალაქის სასამართლოში პროცესი გუშინ, 20 თებერვალს გაიმართა.

„ვითხოვდით პატიმრობა გირაოთი შეცვლილიყო, ვინაიდან ყველა მტკიცებულება უკვე გამოკვლეულია და მოწმეები დაკითხულია, არანაირი საშიშროება არ არსებობდა იმისა, რომ მოწმეებზე ზეწოლა მოეხდინა, ან მტკიცებულებები გაენადგურებინა, ყველაფერი სასამართლოსა და პროკურატურაშია“, – განაცხადა კუგოიანის ადვოკატმა კახა ასპანიძემ.

მორიგი პროცესი ახალქალაქის სასამართლოში ორ მარტს გაიმართება.

წარსულში რამდენჯერმე ნასამართლევი კიმ კუგოიანი სამართალდამცველებმა 2019 წლის 24 მაისს ცეცხლსასროლი იარაღის მართლსაწინააღმდეგო შეძენა-შენახვა-ტარების გამო დააკავეს. შსს–ს განცხადებით კუგოიანი „კრიმინალური ავტორიტეტია“.

მისი გათავისუფლების მოთხოვნით, ახალქალაქში აქციაც გაიმართა. აქციის მონაწილეები ამბობდნენ, რომ კიმ კუგოიანი უდანაშაულოა და მას „იარაღი პოლიციამ ჩაუდო“.

გამოძიება ცეცხლსასროლი იარაღის მართლსაწინააღმდეგოდ შეძენა, შენახვა, ტარების ფაქტზე სისხლის სამართლის კოდექსის 236-ე მუხლის მე-3 და მე-4 ნაწილით მიმდინარეობს.

[sknews.ge]