სააგენტო ვარძიასთან უკანონო მშენებლობაზე: კომპანიამ ტერიტორიას პირვანდელი სახე უნდა დაუბრუნოს

ვარძიის ისტორიული კომპლექსის მოპირდაპირედ, 120 ადგილიან მიწისქვეშა სასტუმროს მშენებლობა კულტურული მემკვიდრეობის დაცვის სააგენტომ აპრილში შეაჩერა.

ტერიტორიის მფლობელები რუსეთში მოღვაწე ბიზნესმენი სოსო ორჯონიკიძე და ბორჯომის ყოფილი გამგებელი ემზარ ასპანიძე არიან.

სააგენტოში განმარტავენ, რომ კომპანია „ნიალა“ ვალდებულია მშენებლობის შეჩერების შემდეგ, ტერიტორია მოაწესრიგოს და ეცადოს პირვანდელი სახე დაუბრუნოს: „ადგილი გაველურებულია, საშინლად არის დატოვებული. რაც ააშენა ის უნდა მოანგრიოს და მიწის ნაშალი, რაც ტექნიკით გამოიღეს, გადაასწოროს. შეძლების მიხედვით, მანამდე არსებულ ლანდშაფტს უნდა მიუსადაგოს“.

კომპანია „ნიალას“ ერთ-ერთი მფლობელი ემზარ ასპანიძე ამბობს, რომ მის ტერიტორიაზე არაფრის შეცვლას აპირებს, ვარძიის გენგეგმის მომზადების შემდეგ კი სასტუმროს მშენებლობის გაგრძელებას გეგმავს: „ჩემს საკუთარ ტერიტორიაზე რა უნდა გავაკეთო, ამას ვალდებულებაში ვერ ჩამიდებენ. ასეთი ვალდებულების შესახებ არავითარი შეტყობინება არ მომსვლია და კიდევაც რომ მომივიდეს, მე ვაპირებ პროექტის გაგრძელებას“.

მისივე თქმით, ტერიტორიის პირველ მდგომარეობაზე დაბრუნება შეუძლებელი იქნება, რადგან აშენებული კედლის დემონტაჟი სხვა პრობლემებს გამოიწვევს.

„მე რომ ტერიტორიის პირველ სახის დაბრუნება დავიწყო, იქ არსებული საავტომობილო გზა ჩამოიშლება, თუ თვითონ აიღებენ პასუხისმგებლობას და სახელმწიფოზე მიყენებული ზარალის ანაზღაურებას არ მომთხოვენ, მაშინ კი ბატონო, პრობლემა არ არის“, - ამბობს ემზარ ასპანიძე.

სააგენტოს ინფორმაციით, ამ დროისთვის სივრცის დაგეგმარებისა და მართვის გეგმის შემუშავება მიმდინარეობს, დოკუმენტის მომზადებამდე კი ისტორიული კომპლექსის მიმდებარედ სამშენებლო ნებართვებს არ გასცემენ: „ეს არის კომპლექსური დოკუმენტი, რომელზეც მუშაობს ინფრასტრუქტურის სამინისტრო, კულტურული მემკვიდრეობის დაცვის სააგენტო, მათ შორის იუნესკოს ექსპერტების ჩართულობით. დოკუმენტის მომზადებაში ასევე გვეხმარება ამერიკის განვითარების სააგენტო“, - განმარტავენ კულტურული მემკვიდრეობის დაცვის სააგენტოში.



ვარძიის პირდაპირ კომპანია 'ნიალა' მესხური სოფლის მსგავს სასტუმროს უკანონოდ აშენებდა

სამუშაოები სააგენტოს უარის მიუხედავად მიმდინარეობდა - ანთიძე ვარძიასთან სასტუმროს მშენებლობაზე

‘თუ უარს გვეტყვიან, თუთის ხეებს დავრგავ’ – ემზარ ასპანიძე ვარძიასთან სასტუმროს მშენებლობაზე

ვინ არის მოსკოველი ბიზნესმენი, რომელიც ვარძიაში სასტუმროს აშენებს

[თაკო ფეიქრიშვილი, ასპინძა]