'მცემეს, დამკოჭეს და პირი გამიკრეს' – ყაჩაღობა კარწახში

როგორც ფერმის დარაჯი სარგის გასპარიანი jnews.ge-სთან აცხადებს, ორმა სამხედროფორმიანმა თავში ავტომატის კონდახი ჩაარტყეს, პირი აუკრეს, სცემეს, ხელბორკილი დაადეს და წავიდნენ. შემთხვევა 19 მაისს, დაახლოებით 01:00 საათზე მოხდა.

"შემოვიდნენ და მოითხოვეს ტელეფონი. მე ქართულად ვუთხარი, რომ არ მივცემდი, ისინი კი თურქულად მელაპარაკებოდნენ. ერთ–ერთმა როგორ არ მომცემო და ავტომატის კონდახი დამარტყა. მე მოვასწარი ტელეფონის გადაგდება. დამკოჭეს, პირი გამიკრეს და წავიდნენ“ – ჰყვება სარგის გასპარიანი.

მისი თქმით, როცა ყაჩაღებმა საქონელი წაიყვანეს, ხელები გაითავისუფლა და მომხდარის შესახებ ფერმის მეპატრონეს შეატყობინა. ატომ ოგმრციანმა მაშინვე დარეკა პოლიციაში.

ფერმის მეპატრონის განმარტებით, მესაზღვრეებმა საქონლის უკან დაბრუნება შეძლეს: "იყო სროლა, ყაჩაღები ცხენებით იყვნენ და მიიმალნენ".

შინაგან საქმეთა სამინისტროში განმარტავენ, რომ მომხდარზე ძიება 179–ე, ყაჩაღობის მუხლით მიმდინარეობს.



[sknews.ge]