‘პირი და ხელები ‘სკოჩით’ გაუკოჭეს’ – ახალციხეში 78 წლის ქალი გაძარცვეს

შემთხვევა ახალციხეში, 10 აგვისტოს, გვიან ღამით მოხდა. როგორც დაზარალებულის მეზობლები ყვებიან, სამი პირი გ.ფ–ს სახლში 03:00 საათზე, უკანა ფანჯრიდან შევიდა.

„ამ ქალს მძინარეს დადგომიან თავზე, ფული მოგვეციო. ქალს უთქვამს, 200 ლარი მაქვს და წაიღეთო. იმათ უთქვამთ, ვიცით რომ კიდევ გაქვს მეორე ოთახში და ისიც მოგვეციო. ამასობაში ერთ–ერთისთვის ქალს ფეხი ამოურტყია. ამის მერე იმათ ეს ქალი ისე უცემიათ, რომ დილამდე უგონოდ ეგდო, თან პირი და ხელები „სკოჩით“ გაუკოჭიათ“, – გვიყვება ერთ–ერთი მეზობელი, რომელმაც დილით დაშავებული გ.ფ–ს ნახვის შემდეგ პოლიციაში დარეკა.

მისივე თქმით, დაზარალებულს დაზიანებები ძირითადად თავის არეში ჰქონდა მიყენებული: „განსაკუთრებით თვალებთან ჰქონდა ჩალურჯებები. ეტყობა თვალებში ურტყეს, სასწრაფოც იყო მოსული, მაგრამ საავადმყოფოში არ წაიყვანეს, ადგილზე გასინჯეს და წავიდნენ“.

როგორც მეზობლები ყვებიან, დაშავებულმა ერთ–ერთი ხმით იცნო.

„შესაძლოა ნათესავიც იყო, ისიც კი სცოდნიათ რომელ ოთახებში ინახავდა ფულს. ამბობენ, რომ ორი კაცი და ერთი ქალი იყო“, – ამბობს მეზობელი თამარ ჭალიძე.

„სამხრეთის კარიბჭეს“ დაზარალებული შინ არ დახვდა. იგი ახალციხეში დასთან იმყოფება.

„ჩემთანაა და ახლა კარგად არის, არ უნდა არაფერზე ლაპარაკი“, – გვითხრა დაზარალებულის დამ და კარი მოგვიხურა.

მომხდარს შსს ორგანიზებული ჯგუფის მიერ ძარცვის მუხლით იძიებს. უწყების ინფორმაციით, მძარცველებმა სახლიდან 400 ლარი წაიღეს. ბრალის დამტკიცების შემთხვევაში აღნიშნული მუხლი, 5–დან 8–წლამდე პატიმრობას ითვალისწინებს.

[ლუბა გიორგაძე, ახალციხე]