სკვერი ხეების გარეშე

ახალციხის ცენტრალური პარკის, თამარაშვილის ქუჩზე მდებარე საპატრულო პოლიციისა და ასევ მშენებარე იუსტიციის სახლის ადგილზე ხეების მასობრივი გაჩეხვის შემდეგ, მოსახლეობა ხეების ჭრის პროცესს კიდევ უფრო გაღიზიანებული შეხვდა.

”რა უნდა ააშენონ იმის ფასი, რასაც ჭრიან?! გაჩეხეს მათელი ქალაქი! - აცხადებენ თამარაშვილის ქუჩის მცხოვრებლები და პრესასთან ინკოგნიტოდ რჩებიან - როცა პოლიციისა და იუსტიიის სახლის ადგილზე ჩეხავდნენ ხეებს და ხმა ამოვიღეთ, ამისთვის დავისაჯეთ, ჩვენ რა შეგვიძლია?! ვდგავართ ასე უსუსურად და შორიდან ვუყურებთ, როგორ ჭრიან ხეებს”.

როგორც ხეების მჭრელები აცხადებენ, აქ მხოლოდ ხუთი ხე მოჭრეს, სამი წიწვოვანი და ორი ფოთლოვანი: ”მათ გარდა კიდევ ერთი ხმელი ხე იყო, მაგრამ დავტოვეთ”.

თამარაშვილის ქუჩაზე სკვერს ”ვისოლი” აკეთებს. მასვე ეკუთვნის ქალაქის ცენტრში, ყოფილი გუბერნიის შენობაში მშენებარე ოთხვარსკვლავიანი სასტუმრო, სავაჭრო ცენტრი ”სმარტი” და აქვე ბენზინგასამართი სადგურიც.

ახალციხის მუნიციპალიტეტის საკრებულოს თავმჯდომარის მალხაზ გიქოშვილის განცხადებით, აქ მხოლოდ ტუია და ერთი ”უსახური ხე” მოიჭრა: ”სხვას ხელს არაფერს ვკიდებთ, რადგან არც დარგვა გვაქვს გათვალისწინებული. ამიტომ სკვერი იმ გამწვანებით მოეწყობა, რომელიც ამჟამადაა”.

მისივე თქმით, ტუია საერთოდ მტვრის ბუდეა, თან მათი მოჭრა გზის გაფართოებისთვის გახდა საჭირო: ”იუსტიციის სახლის მშენებლობისას გზა დავიწროვდა. ამიტომ ,სკვერის გასწვრივ მდებარე ბორდიულის ხარჯზე გავზრდით გზას. ბორდიულს კი შიგნით, სკვერის მხარეს შევწევთ”.

აქ მოეწყობა სკვერი პატარა ბილიკებით, დასასვენებელი სკამებით, წყლითა და განათებით. მუშაობა თვის ბოლომდე დასრულდება.

[თამუნა უჩიძე, ახალციხე]