”გუბერნატორმა ხეების მოჭრა დაგვავალა და ვჭრით”

კოსტავას ქუჩაზე ე.წ. პიტიატაშკებში, მძიმე ტექნიკა მუშაობს. ჯერ გზა სწორდება, შემდეგ კი ასფალტი დაიგება.

ტრანსპორტითა და ფეხით მოსიარულეთათვის თავისუფლად გადაადგილების მიზნით, გზაზე ხეეები მოჭრეს. ხეები მოჭრეს ეზოებში, კორპუსების წინაც.

”ამ დასახლებაში სახურავების გადახურვაზე ვმუშაობდი, 6 კორპუსი გადავხურეთ. ახლა გუბერნატორმა ხეების მოჭრა დაგვავალა და ვჭრით”, - ამბობს ინდმეწარმე მარკიროს საპონჯიანი.

ამავე დასახლების მკვიდრის მედიკო ნებაძის თქმით, აქ გუბერნატორი გუშინ საღaმოს იყო: ”კანალიზაციის მილია ზემოთ ამოწეული და გვითხრა, რომ სანამ ეს არ მოწესრიგდება, მანამდე ზემოდან ასფალტს არ დააგებენ”.

რაც შეეხება მოჭრილ ხეებს, ამბობს რომ ” ახალი დაგებული გზა კარგი იქნება”.

ხეების ჭრაზე უბანში დაახლოებით ექვსი კაცი მუშაობს.

უკმაყოფილო მოსახლეობა ამ პროცესს კორპუსების ფანჯრებიდან და აივნებიდან ადევნებს თვალყურს, მაგრამ კომენტარის გაკეთებისგან თავს იკავებენ.

”არსად დამწეროთ, ამ პერიოდში რამის თქმა მტერმა გაბედოს! ჩემი თქმით აქ არაფერი შეიცლვება”, - გვითხრა შუახნის მამაკაცმა და გაგვეცალა.

მუშის თემურ კაპანაძის თქმით, სამხედრო დასახლებაში 22 ხე მოიჭრა და 6-ს კიდევ მოჭრიან.

[თამუნა უჩიძე, ახალციხე]