‘ნაგავს ტომრებით ავტოფარეხში ვინახავთ’– სამსონიძის ქუჩაზე ბუნკერების დადგმას ითხოვენ

სამსონიძის ქუჩაზე მცხოვრები ლაურა ვარიგიანი ამბობს, რომ მათ დასახლებაში ნაგავმზიდი ყოველ ორშაბათს მიდის: „კარგი იქნება თუ ურნას დაგვიდგამენ. ბევრჯერ ვუთხარით მერიის წარმომადგენლებს, მაგრამ გვეუბნებიან, როცა ასფალტს დააგებენ, ურნებსაც მერე დადგამენო".

ორშაბათიდან ორშაბათამდე სამსონიძის ქუჩაზე ადგილობრივები ნარჩენებს ტომრებში აგროვებენ: „ყოველ ორშაბათს პატიოსნად მოდის ნაგვის მანქანა. მაგრამ მანამდე გარაჟში ვმალავთ ხოლმე ნაგავს. გარეთ ხომარ დავდებთ, უხერხულია, თან ძაღლები და კატები ამოქექავენ“.

გარდა სამსონიძის ქუჩისა, ახალციხეში კიდევ ოთხი ქუჩა ისეთი, სადაც ნარჩენების გასატანად ნაგავმზიდს ელოდებიან. თუმცა, როგორც „კეთილმოწყობის“ სამსახურში ამბობენ, ამ დასახლებებში ნაგვის მანქანა კვირაში რამდენჯერმე მიდის.

„არ არსებობს, რომ მანქანა ერთი კვირის შუალედით მიდიოდეს მოსახლეობასთან, მითუმეტეს ქალაქში, ეს ორჯერ და მეტჯერაც ხდება. არ ვიცი ზუსტად უნდა გავარკვიო მანდ [სამსონიძის ქუჩაზე] თუ ეგრეა“,– გვითხრა შპს „კეთილმოწყობის“ დირექტორმა კობა კურტანიძემ.

მისი თქმით, თუ ადგილობრივები ოფიციალურად მოითხოვენ ქუჩაზე ურნის დადგმას, მაშინ დაუდგამენ, თუმცა პრობლემა ისაა, რომ სამსონიძის ქუჩაზე ასფალტი არაა, ამის გამო კი ის ნაგავმზიდი, რომელმაც ბუნკერიდან ნაგავსაყრალმდე ნარჩენები უნდა გაიტანოს, შესაძლოა დაზიანდეს: „იცი რა, ჩვენი ახალი მანქანები „მერსედესის“ ფირმისაა და რამე რომ დაუშავდეთ გარანტიას მოგვიხსნიან, ამიტომ პირველ რიგში გზა უნდა მოწესრიგდეს“.

მერიაში ამბობენ, რომ ასფალტს დააგებენ, ოღონდ მას შემდეგ რაც აქ „წყალმომარაგების კომპანია“ საკანალისაციო ქსელს გააკეთებს: „ახლა რომ დავაგოთ, მერე აყრიან და აზრი არ აქვს“.

საქართველოს გაერთიანებული წყალმომარაგების კომპანიაში კი გვითრეს რომ მათ უკვე ყველა დოკუმენტი შეაგროვეს, და სამსონიძის ქუჩაზე კანალიზაციის ქსელის მოწყობაზე ტენდერს უახლოეს დღეებში გამოაცხადებენ.



[მარიამ ბარძიმაძე, ახალციხე]