ბეჟანოში უგზოობის გამო ნაგავმზიდი ვერ მიდის, ამიტომ ნარჩენებს გზის პირზე ყრიან

ბეჟანოში მცხოვრებლები ნარჩენებს უკვე წლებია სოფლის შესასვლელში გზის პირზე აგროვებენ.

„არ მოგვწონს ამდენი ნაგავი რომ არის სოფელთან, მაგრამ რა ვქნათ, სადღაც ხომ უნდა გადავყაროთ, არც ნაგვის ურნებია სოფელში და არც ნაგვის მანქანა დადის“, – ამბობენ ადგილობრივები.

ახალქალაქის მუნიციპალიტეტის მერის იური უნანიანის განცხადებით, იმ სოფლებში, სადაც ასფალტი არაა დაგებული, ნაგვის ურნები არ დგას: "ცუდი გზებია და ნაგვის მანქანამ რომ იქ იაროს, გაგვიფუჭდება. ბეჟანოში მართლაც დიდი ნაგავსაყრელია, ასეთი პრობლემა სხვა სოფლებშიც გვაქვს. წელს ვეცდები დაზამთრებამდე გავწმინდოთ. მომავალ წელს ალბათ ეგეთი ნაგავსაყრელებიდან ნარჩენების გასატანად ტენდერს გამოვაცადებ".

ახალქალაქის მერიამ მიმდინარე წლის დასაწყისში რეგიონული განვითარების სამინისტროდან 300 ახალი პლასტმასის ურნა მიიღო, მათ შორის 160 ქალაქში, 42 კი ახალციხე-ბაკურიანი-ნინოწმინდა-კარწახის მიმართულებით გზებზე განალაგა. უნანიანი მაშინ აცხადებდა, რომ „მუნიციპალიტეტს კიდევ 1 350 დიდი ურნა სჭირდება, ოღონდ ეს მომავალში ნაგვის სეპარირებისთვის“.





[მარიამ ბარძიმაძე, ახალქალაქი]