ახალციხის ბაზარში მდებარე სასაკლაო მეოთხედ დააჯარიმეს

სასაკლაოს სალექარებიდან აღებულ წყლის ანალიზში ჩანს, რომ შეწონილი ნაწილაკები დაშვებულ ნორმას დაახლოებით 12–ჯერ აღემატება. ახალციხის რაიონული სასამართლოს გადაწყვეტილებით შპს „ირქა“ 25 მარტს დაჯარიმდა.

„ სასაკლაოს სალექარებიდან გამოსული დაბინძურებული წყლებით მდინარის დაბინძურების, მუნიციპალური ნარჩენებით გარემოს დანაგვიანების და სახიფათო ნარჩენების ზედაპირულ წყლებში ჩაშვების გამო, შპს „ირქას“ შეუდგინეს ოქმი, ადმინისტრაციულ სამართალდარღვევათა კოდექსის 58-ე მუხლის -1 ნაწილით, ნარჩენების მართვის კოდექსის 31-ე მუხლის მე-7-ე ნაწილით და 36-ე მუხლის პირველი ნაწილით გათვალისწინებული ქმედების გამო“, – აცხადებენ გარემოსდაცვითი ზედამხედველობის დეპარტამენტში.

2016 წლიდან დღემდე შპს „ირქა“ ჯამში ოთხჯერ დაჯარიმდა.

„შპს "ირქას" მიმართ გარემოსდაცვითი ზედამხედველობის დეპარტამენტს 2016 წელს აქვს შედგენილი ოქმი ადმინისტრაციულ სამართალდარღვევათა კოდექსის 58–ე მუხლის პირველი ნაწილითა და ნარჩენების მართვის კოდექსის 34-ე მუხლის პირველი ნაწილით, 2017 წელს ადმინისტრაციულ სამართალდარღვევათა კოდექსის 58 მუხლის მეოთხე ნაწილით, ხოლო 2018 წელს ნარჩენების მართვის კოდექსის 33-ე მუხლის მეორე ნაწილით. თითოეულ ფაქტზე შპს "ირქა" სასამართლომ 500-500 ლარით დააჯარიმა“, – გვწერენ გარემოსდაცვითი ზედამხედველობის დეპარტამენტის სამცხე-ჯავახეთის რეგიონული სამმართველოდან.

სავაჭრო ცენტრ „ახალციხეს“მენეჯერი ვახტანგ ქართველიშვილის განცხადებით სასაკლაოდან სისხლიანი წყალი მაშინ გადის, როცა ბევრი სული იკვლება, ამ დროს ფილტრები წყლის გაწმენდას ვეღარ ასწრებენ.

[თინათინ ზაზაძე, ახალციხე]