გარემოს დანაგვიანებისთვის სამცხე–ჯავახეთში 278 პირია დაჯარიმებული

„ნარჩენების მართვის კოდექსის“ შესაბამისად, რომელიც მიმდინარე წლის 15 იანვარს ამოქმედდა, გარემოს დანაგვიანება კანონით ისჯება. გარემოს დაბინძურებაზე ჯარიმების მინიმალური ოდენობა 50 ლარი, მაქსიმალური კი, 5 000 ლარია. ჯარიმის მოცულობა იმის მიხედვით განისაზღვრება, რამდენად სახიფათოა გადაყრილი ნარჩენი გარემოსთვის, როგორია მისი მოცულობა და ვინ აბინძურებს გარემოს – ფიზიკური პირი თუ ორგანიზაცია.

საქართველოს შინაგან საქმეთა სამინისტროს საპატრულო პოლიციის დეპარტამენტში არსებული მონაცემებით, საქართველოს ნარჩენების მართვის კოდექსის 31–ე მუხლის პირველი ნაწილით გათვალისწინებული გადაცდომისთვის სამცხე–ჯავახეთის რეგიონში, 2015 წლის იანვრიდან 2015 წლის 1 ივნისამდე დაჯარიმებულია 233 პირი, ხოლო 31–ე მუხლის მე–3 ნაწილით 45 პირი.

31–ე მუხლის პირველი ნაწილი 1. 2 კგ-მდე მუნიციპალური ნარჩენით გარემოს დანაგვიანებას გულისხმობს, რაც იწვევს დაჯარიმებას 80 ლარის ოდენობით. ხოლო 31–ე მუხლის მე–3 ნაწილი გულისხმობს იგივე ქმედების ჩადენას ავტოსატრანსპორტო საშუალებებიდან, აღნიშნული იწვევს მძღოლის, ხოლო საზოგადოებრივი ტრანსპორტის შემთხვევაში – შესაბამისი დამრღვევის დაჯარიმებას 120 ლარის ოდენობით.

[თამარ თოთაძე, ახალციხე]