ახალციხის ბაზარში, სასაკლაოზე დაკლული საქონლის სისხლი მდინარეში ჩადის [Video]

სასაკლაო მდინარე ფოცხოვის ნაპირზეა. შენობიდან კი სპეციალური მილია გაყვანილი, რომლითაც წყალში საქონლის სისხლი მიედინება.

„წადით აქედან, მეტი საქმე არ გაქვთ?! დამანებეთ თავი!“, – ასე უპასუხეს „სამხრეთის კარიბჭეს“ სასაკლაოზე მას შემდეგ რაც მდინარის დაბინძურების ფაქტზე ფოტო და ვიდეო გადავიღეთ.



სასაკლაო ორი წელია ფუნქციონირებს და როგორც ადგილობრივები ამბობენ, როცა აქ პირუტყვი იკლვება, სისხლი ყოველთვის მდინარეში მიედინება: „დიდი ხანია, ასეთი მდგომარეობააა. ზაფხულობით ზუსტად ამ მხარეს ბავშვები ბანაობენ და საშინელი სუნიც დგას–ხოლმე, როგორ შეიძლება ასეთი განუკითხაობა!“

ბაზრის მენეჯერის ვახტანგ ქართველიშვილის თქმით, შპს „ირქა“ ბაზრის დაქვემდებარებაშია და აქ დაკლული საქონლის ხორცი ბაზარში იყიდება.

„დღეში შეიძლება ორი, ან სამი სული საქონელი დავკლათ, მაგას რა სისიხლი უნდა ჰქონდეს, თან სპეციალური ფილტრები გვაქვს დაყენებული, მაგრამ მაინც ისე ვერ ფილტრავს. სად წავიღოთ ეს სისხლი? მთელი ქალაქის კანალიზაცია მაგ მდინარეში ჩაედინება და მაინცდამაინც ჩვენით რატომ დაინტერესდით?! “– კითხულობს ვახტანგ ქართველიშვილი.

მომხდარის შესწავლა „სამხრეთის კარიბჭის“ ინფორმაციის საფუძველზე უკვე დაიწყო გარემოსდაცივითი ზედამხედველობის დეპარტამენტმა. თუმცა, დღის მეორე ნახევარში, ადგილზე მისულ თანამშრომლებს მდინარე დაბინძურებული აღარ დახვდათ, მაგრამ მისი მიმდებარე ტერიტორია იყო დანაგვიანებული. ამის გამო კი "ირქას" სამართალდაღვევის აქტი შეუდგინეს.

„მდინარის სისხლით დაბინძურებას გავაკონტროლებთ და თუ დადგინდა რეაგირებასაც მოვახდენთ. ნარჩენების განთავსებაზე კი დათვალიერება მიმდინარეობს, ამიტომ ჯერ არ ვიცით ნარჩენების მართვის კოდექსის რომელი მუხლით დავაჯარიმებთ სასაკლაოს“, – გვიხსნიან გარემოსდაცვითი ზედამხედველობის დეპარტამენტში.

„ირქა“ გარემოსდაცვითი ზედამხედველობის დეპარტამენტს დაჯარიმებული გარდა ზემოთ აღნიშნული ფაქტებისა კიდევ ორჯერ ჰყავს: პირველად იგი ნარჩენების მართვის კოდექსის 33–ე მუხლის პირველი ნაწილით 2016 წლის აგვისტოში 500 ლარით, დააჯარიმეს. ეს მუხლი ფეკალური მასებით, ან კანალიზაციის ნარჩენებით ტერიტორიის დაბინძურებას გულისხმობს. ამავე პერიოდში სასაკლაო ადმინისტრაციულ სამართალდარღვევათა კოდექსის 58–ე მუხლის პირველი ნაწილითაც, 2017 წლის იანვარში 500 ლარამდე დაჯარიმდა, რაც წყლის დაცვის რეჟიმის დარღვევას გულისხმობს.

რამდენი ლარის გადახდა მოხუდება სასაკლაოს მეოთხედ ეს მოკვლევის დასრულების შემდეგ გაირკვევა.



[ლუბა გიორგაძე, ახალციხე]