ახალციხის ბაზარში სასაკლაო გარემოს ფეკალური მასებით აბინძურებს

სასაკლაოს, ნარჩენების მართვის კოდექსის 33–ე მუხლის მეორე ნაწილით, რაც ფეკალური მასით, ან კანალიზაციის ნარჩენით ტერიტორიის დაბინძურებას გულისხმობს, აჯარიმებენ. აღნიშნული მუხლი ჯარიმას 500 ლარის ოდენობით ითვალისწინებს.

რაც შეეხება, ამავე სასაკლაოდან დაკლული საქონლის სისხლის მდინარეში ჩაშვებას, გარემოსდაცვითი ზედამხედველობის დეპარტამენტი ამ საკითხზე მოკვლევას აწარმოებს. როგორც უწყებაში ამბობენ, სასაკლაოზე მათი თანამშრომლები ისეთ დროს მივიდნენ, როცა დაკვლა არ მიმდინარეობდა, ამიტომ მდინარის დაბინძურების ფაქტს ვერ შეესწრნენ: „აქტიურ სამუშაო პროცესს დაველოდებით და ადგილს მაშინ დავათვალიერებთ როცა სისხლის ჩადინების ნახვა შესაძლებელი იქნება. ასევე, ლაბორატორიულად შევისწავლით, თუ რა ტიპის დაბინძურებასთან გვაქვს საქმე და იმის მიხედვით დაკვალიფიცირდება ადმინისტრაციული სამართალდარღვევის ოქმი“.

„ირქა“ გარემოსდაცვითი ზედამხედველობის დეპარტამენტს დაჯარიმებული გარდა ზემოთ აღნიშნული ფაქტებისა კიდევ ორჯერ ჰყავს: პირველად იგი ნარჩენების მართვის კოდექსის 33–ე მუხლის პირველი ნაწილით 2016 წლის აგვისტოში 500 ლარით, დააჯარიმეს. ეს მუხლი ფეკალური მასებით, ან კანალიზაციის ნარჩენებით ტერიტორიის დაბინძურებას გულისხმობს. ამავე პერიოდში სასაკლაო ადმინისტრაციულ სამართალდარღვევათა კოდექსის 58–ე მუხლის პირველი ნაწილითაც, 2017 წლის იანვარში 500 ლარამდე დაჯარიმდა, რაც წყლის დაცვის რეჟიმის დარღვევას გულისხმობს.

ორ ივნისს კი გარემოსდაცვითი ზედამხედველობის დეპარტამენტი სასაკლაოზე "სამხრეთის კარიბჭის" ინფორმაციის საფუძველზე შევიდა.

[ავთო ინასარიძე, ახალციხე]