ახალციხეს უკრაინიდან 14 ტურისტული კომპანიის წარმომადგენელი ეწვია

შეხვედრაზე სტუმრებს ახალციხის, ასპინძისა და ადიგენის მერებმა საკუთარი მუნიციპალიტეტების ისტორიული ძეგლები და ტურისტული ადგილები ვიდეორგოლების საშუალებით უჩვენეს.

ელენა პიჟიკოვა უკრაინაში ერთ–ერთ დიდი ტურისტული სააგენტოს წარმომადგენელია. მისი აზრით სამცხე–ჯავახეთს კარგი ტურისტული პოტენციალი გააჩნია: „ძალიან მომწონს თქვენი ქვეყანა და ეს რეგიონიც. ჩვენი სააგენტო აერთიანებს სხვა პატარა სააგენტოებს და ჩვენგან იღებენ ისინი ინფორმაციას. ეს ყველაფერი გვაძლევს იმის საშუალებას, რომ ჩვვენს ტურისტებს გავესაუბროთ და ვუთხრათ თუ როგორი კარგი ქვეყანაა საქართველო და განსაკუთრებით ეს რეგიონი. ჩვენ ვურჩევთ მათ აქ ჩამოსვლას“.

უკრაინული ტურისტული კომპანიების საქართველოში ვიზიტი მას შემდეგ დაიგეგმა, რაც ახალციხის ციხისა და მერიის თანამშრომლები უკრაინაში ტურისტულ ფესტივალზე იყვნენ.

სტუმრებმა დღეს ახალციხის ციხე და ბორჯომის ღირსშესანიშნაობები დაათვალიერეს, ხვალ ვარძიას მოინახულებენ და ზეგ უკრაინაში გაემგზავრებიან.



[მარიამ ბარძიმაძე, ახალციხე]